Gjykata Themelore e Ferizajt në Kosovë ka vendosur një muaj paraburgim ndaj të dyshuarit me inicialet A.K. i moshës 33-vjeçare. Ai akuzohet për plagøsjen e dy personave në Shtërpcë, komunë e banuar me shumicë serbe.
Seanca gjyqësore për caktimin e masës ndaj pjesëtarit të Forcës së Sigurisë së Kosovës (FSK), i cili dyshohet se ka plagosur dy të rinj serbë, u mbajt të dielen.
Në njoftimin e kësaj gjykate thuhet se është vlerësuar se ekziston dyshimi që në një fshat të Komunës së Shtërpcës, i dyshuari me dashje ka tentuar që t’i privojë nga jeta të dëmtuarit M.S dhe S.S.
Më tej bëhet e ditur se në kundërshtim me Ligjin për armët në Kosovë, i dyshuari ka përdorur armën me leje.
Lexo më tej: FOTO/ Ushtari i Kosovës që plagosi 2 serbët, djalë i një dëshmori të UÇK-së
Më 6 janar Policia e Kosovës njoftoi se dy persona, njëri rreth 11-vjeçar dhe tjetri rreth 21-vjeçar, janë plagosur me armë zjarri. Ngjarja ndodhi në fshatin Drajkovc, komunë e banuar me shumicë serbe.
Lidhur me rastin, në po të njëjtën ditë, PK-ja ka identifikuar e më pas ka arrestuar të dyshuarin A.K.
Ministri i Mbrojtjes i Kosovës, Armend Mehaj njoftoi të premten se në rastin që ka ndodhur në Shtërpcë ishte përfshirë “një pjesëtar i Forcës së Sigurisë së Kosovës”. Ai shtoi se me të janë duke u marrë organet e sigurisë dhe drejtësisë.
Ndaj incidentit në Shtërpcë kanë reaguar të premten edhe presidentja e Kosovës, Vjosa Osmani. Edhe kryeministri Albin Kurti.
Osmani tha se “plagosja e të rinjve 11 dhe 21-vjeçar në Shtërpcë është akt i patolerueshëm”. Dhe, se autori duhet të vihet para drejtësisë. Ndërsa Kurti tha se është “thellësisht i brengosur për plagosjen e tyre”.
Edhe përfaqësues të tjerë ndërkombëtarë e kanë dënuar incidentin në këtë komunë të banuar me shumicë serbe.
Pas plagosjes së dy të rinjve serbë, të dielen u protestua në Shtërpcë.
Aty u tha se protesta u organizua pas “shtypjes së vazhdueshme të serbëve në Kosovë”./REL