Transferimi i Joao Cancelo nga Manchester City te Bayern Munich bëri bujë duke pasur parasysh vlerën dhe aftësinë e lojtarit. Portugezi humbi vendin si titullar pas Botërorit të Katarit. Ishte koha kur Pep Guardiola ndryshoi disa detaje të taktikave të tij. Në atë moment, mbrojtësi e kuptoi se ai nuk ishte më në qendër të projektit të Citizens dhe thirrja nga Bayern ishte e parefuzueshme.
I intervistuar për “O Jogo”, mbrojtësi portugez ka rrëfyer arsyen e largimit nga Manchester City: “Pas Kupës së Botës, Guardiola ndryshoi mënyrën e lojës, me anësorin më brenda fushës. Kështu ai preferoi Ake dhe Lewis në vendin tim. E respektova zgjedhjen sepse kjo është ajo që duhet të bësh në një ekip të madh. Por ndihesha i rëndësishëm dhe doja të luaja”. Më pas Cancelo kërkoi një bisedë me trajnerin ku u sqaruan.
Lexo më tej: Bayern Mynih bëhet super ofensiv: nga Manchester City zbarkon në Bavari Joao Cancelo
Futbollisti, duke vazhduar rrëfimin e tij, tregon bisedën që bëri me teknikun Guardiola: “Kemi bërë një bisedë, jo një diskutim dhe kushdo që thotë të kundërtën gënjen. Ne vendosëm që lamtumira ishte zgjidhja më e mirë për të gjithë. E oferta e Bayern Munich ishte e parefuzueshme”.