Dy gola në dy ndeshje nuk është diçka e pazakontë në futboll. Por dy gola në dy ndeshjet e para me kombëtaren është diçka për të cilën Mateo Retegui ndihet krenar. Zbulimi i teknikut të kombëtares italiane Roberto Mancini ka ndezur interesimin e klubeve italiane për të. Aktualisht te Tigre, i huazuar nga Boca Juniors, italo-argjentinasi nga shumë përshkruhet si pasardhësi i Batistutës.
“Interesi i Interit? Sot mendja e tij është totalisht e kthyer te Tigre dhe kombëtarja”. Babai-menaxher i Mateo Retegui, Carlos, kërkon të ndalë zërat e merkatos, që mund ta shqetësojnë sulmuesin. Retegui, autor i dy golave në dy daljet e tij të para me ekipin kombëtar, është në sytë e klubeve të mëdha në Itali dhe jashtë saj. “Ai duhet të qëndrojë i qetë dhe të mbajë këmbët në tokë – tha Carlos ekskluzivisht për Sportitalia –. Ai nuk duhet të mendojë për asgjë tjetër veçse të mësojë dhe të përmirësohet”.
Lexo më tej: Video/ Retegui e Pessina thyejnë Maltën: Italia kthehet të fitojë, Portugalia i bën 6 Luksemburgut
Përveç Interit, në Itali edhe Milan e Lazio i kanë sytë te sulmuesi i lindur në vitin 1999. “Jam shumë i lumtur dhe krenar që Mateo është pjesë e kombëtares italiane – tha sërish babai i tij –. E i jam shumë mirënjohës Roberto Mancinit, stafit të tij dhe të gjithë lojtarëve që e kanë pritur në mënyrë të shkëlqyer”.