Për shkak të borës së madhe që ka goditur Bavarinë, është shtyrë ndeshja e Bundesligës mes Bayern Munich dhe Union Berlin. Ndeshja, e vlefshme për javën e 13 të kampionatit gjerman, duhej të luhej në Allianz Arena. Por ishte e pamundur të luhej, si tregojnë pamjet që vijnë nga Mynihu dhe që Bayern e konfirmon.
“Reshjet e borës nuk pritet të përfundojnë deri të shtunën në mbrëmje. Edhe nëse do të ishte e mundur hyrja në fushën e Allianz Arena në kushte që do të lejonin që ndeshja të zhvillohej pasdite, rreziqet e sigurisë dhe situata e trafikut e bënë të pashmangshëm anulimin. Dëbora që bie nga çatia e Allianz Arena përbën një rrezik të pallogaritshëm për spektatorët. Për më tepër, është pothuajse e pamundur të arrish në stadium. Autobusë dhe trena të panumërt janë anuluar, shumë rrugë dhe autostrada janë mbyllur plotësisht, linja e metrosë U6, e cila shkon në Frottmaning dhe Allianz Arena, është pezulluar”, thuhet në deklaratën e Bayern.
REKOMANDIMI I POLICISË
“Policia e Mynihut rekomandon që njerëzit të mos dalin nga shtëpitë e tyre. Në këto kushte nuk është e mundur të garantohet që personeli i nevojshëm i sigurisë mund të arrijë në Allianz Arena”, përfundon shënimi. “Na vjen shumë keq që duhet të anulojmë ndeshjen, por siguria e tifozëve tanë dhe mbështetësve të Union Berlin ka përparësi absolute”, tha CEO Jan-Christian Dreesen.
Lexo më tej: Video/ Kane për rekord: Bayern godet në Këln, Tuchel i pari për një natë
PROBLEME TRAFIKU
Moti i keq në Bavari shkaktoi reshje të mëdha dëbore në dhe rreth Mynihut të premten dhe të shtunën. Kjo do të thotë se udhëtimi brenda dhe jashtë qytetit është prekur rëndë, me fluturime dhe trena të anuluar. Transporti në qytet është gjithashtu i kufizuar, që do të thotë se tifozët e Bayern Munich dhe Union Berlin do të kishin vështirësi për të ndjekur ndeshjen e së shtunës, e cila tani është shtyrë.
