Speciale/ Michael Schumacher, 10 vjet nga aksidenti i skive në Meribel: aksidenti, familja, gjendja e sakrificat

Dhjetë vjet “pa” Michael Schumacher. Shumë ka kaluar që nga 29 dhjetori 2013, e diela e fundit e atij viti, e diela e fundit e lumtur për familjen Schumacher. Shtatë herë kampioni i botës (rekord i arritur më vonë nga Lewis Hamilton) po bënte ski në shpatin Les Chamois në Meribel, një vendpushim skish në Haute-Savoie (Francë). Ai ishte në shoqërinë e djalit të tij (pilotit të ardhshëm të Formula 1) Mick, atëherë katërmbëdhjetë vjeç. Sipas dëshmive të drejtpërdrejta të këtij të fundit dhe rindërtimeve të mëvonshme të hetimit, Michael u largua nga pista: për dëshirë ose për një paralele më të lehtë. Më pas ai hyri në një fushë me borë të papërpunuar: një hapësirë jo më shumë se tridhjetë metra e gjerë.

Pakujdesi? Vetëbesim i tepërt? Fati i keq? Diçka që na pret të gjithëve, pa marrë parasysh kur, ku dhe pse? Nuk ka më rëndësi! Skitë ngecën dhe kampioni gjerman u rrëzua, duke goditur kokën në një gur të dale. Si pasojë, një dëmtim shumë i rëndë në kokë që do t’i shkaktonte dëmtim në tru. Ndoshta situata u përkeqësua nga prania e një videokamere në kaskë, që e ka lënduar më keq.

GABIMET QË KUSHTUAN…

Schumacher, i cili do të mbushte dyzet e pesë vjeç pak ditë më vonë (e premte 3 janar), mori ndihmën në vendngjarje. Ndoshta fillimisht u nënvlerësua serioziteti i gjendjes së tij dhe u transportua me avion në spitalin në qytetin e afërt të Moutiers. Vetëm më vonë ai u dërgua në Qendrën Spitalore Universitare të Grenoble, ku iu nënshtrua një operacioni neurokirurgjik, me qëllim kufizimin e pasojave të traumës së rëndë të kokës dhe hemorragjisë cerebrale. Më pas ish-piloti u vendos në koma farmakologjike.

Spitali në metropolin më të madh në të gjithë rajonin e Alpeve u bë shpejt një destinacion për dhjetëra stacione celulare të transmetuesve televizivë nga e gjithë bota. Madje (për disa javë) një vend pelegrinazhi për mijëra të apasionuar pas Formula 1 dhe adhurues të kampionit gjerman, i cili pak më shumë se një vit më parë kishte përfunduar karrierën e tij të dytë në F1 me Mercedes (nga 2010 në 2012), pasi kishte bërë historinë me Ferrarin.

U mendua më e keqja në ditëlindjen e tij, kur gjendja e Michael u përkeqësua. Schumi e kapërceu krizën dhe vëmendja e medias e liroi gradualisht kontrollin e saj, për fat të keq jo pa tentativa për të vjedhur me çdo mënyrë ndonjë imazh të kampionit të dëmtuar. U bënë inkursione në strukturë të personazheve të maskuar si personel mjekësor, zbulime të dosjeve mjekësore dhe kështu me radhë. Pak më pak se gjashtë muaj pas aksidentit (e hënë 16 shkurt 2014), Schumacher u zgjua nga një koma e induktuar dhe u transferua në një klinikë private në Lozanë për të ndërmarrë një proces rehabilitimi.

Lexo më tej: E hipën Schumacher në një Mercedes: tentativa ekstreme për ta rikthyer në normalitet

9 VJET NË “LA RESERVE”

Gjatë kësaj periudhe, Schumacher iu nënshtrua operacioneve të tjera kirurgjikale. E në fund të po asaj vere (e martë 9 shtator) përfundimisht u transferua në vilën “La Reserve”, rezidenca e tij luksoze zvicerane e Gland, në brigjet veriore të liqenit të Gjenevës. Aty ai ka qenë për pak më shumë se nëntë vjet, i ndihmuar çdo ditë nga një staf mjekësor tërësisht i përkushtuar ndaj tij. Schumacher është mbrojtur nga konfidencialiteti total i familjes së tij dhe i shumë pak njerëzve të lejuar në praninë e tij. Ndër këta Jean Todt, ish-presidenti i FIA-s dhe drejtori i ekipit të Ferrarit në kohën e pesë titujve botërorë të Schumacher me kokëkuqen. Francezi ka konfirmuar në më shumë se një rast se ka marrë pjesë në Çmimin e Madh të Formula 1 në shoqërinë e tij para televizorit: “ndryshe, por i pranishëm”.

Këto, së bashku me deklaratat shumë të rralla të familjarëve të tij (si ato të lëshuara së fundi nga vëllai i tij Ralf) janë të vetmet informacione të bazuara dhe të autorizuara për gjendjen e kampionit të madh nga Kerpen. Ato flasin për gjendje të qëndrueshme, duke lënë të kuptohet fatkeqësisht pakthyeshmëria e tyre.

TRASHËGIMIA SPORTIVE TE FËMIJËT

Për të siguruar kurat për të, gruaja e tij Corinna me kalimin e kohës ka nxjerrë në shitje një pjesë të pasurive të paluajtshme. Ndërsa fëmijët e tij kanë gjetur forcën të bëjnë rrugën e tyre në fushat e tyre përkatëse të veprimit, duke fituar nder në sport. Vajza e madhe Gina Maria u bë kampione e hipizmit (pasion i trashëguar nga nëna e saj) dhe e specialitetit të veçantë të reining, frymëzuar nga rodeo amerikan.

Mick, nga ana tjetër, bëri një karrierë të shpejtë në garat e makinave. Ai nisi në kart i trajnuar nga vetë Michael dhe më pas – pas aksidentit në Meribel – te Ferrari që e përfshiu atë në radhët e Driver Academy. Mick garoi dy sezone në Kampionatin Botëror të Formula 1 me ekipin Haas në 2021 dhe 2022. Më pas mbeti pilot i tretë dhe rezervë për Lewis Hamilton dhe George Russell te Mercedes. Edhe pse shanset e tij për t’u rikthyer në një pilot të rregullt në Formula 1 janë objektivisht të kufizuara, Mick është sot një pilot profesionist: për Mercedes dhe për Alpine, me të cilin po përgatitet të garojë në WEC (World Endurance Championship).

PRIVATËSIA HERMETIKE NË FORTESËN GLAND

Privatësia e Schumacher (dhe ajo e rrethit të tij familjar) mbrohet në fortesën Gland (e rrethuar nga pyje, fusha golfi dhe e mbrojtur nga ujërat e liqenit të Gjenevës) me anë të një sistemi sigurie të paprecedentë. Gjithçka tjetër janë spekulime, shpikje dhe indiskrecione kundër të cilave familjes Schumacher i është dashur të marrë masa ligjore disa herë. Ndërkohë, Michael (tani po i afrohet ditëlindjes së tij të pesëdhjetë e pesë) jeton një përditshmëri që duket se është gjithmonë e njëjtë. Sidoqoftë në kontrast të plotë me furinë e viteve që jetoi si personazh publik dhe protagonist absolut i sportit motorik për dy dekada.

Bashkatdhetari i tij Sebastian Vettel ishte kampion bote katër herë radhazi (nga 2010 deri në 2013), Lewis Hamilton ishte i pari që theu disa rekorde dhe iu bashkua atij me shtatë tituj, Max Verstappen kërcënon rekordet e Schumacher dhe (pas titullit të tretë radhazi), duket i aftë për të barazuar e ndoshta kaluar shtatë titujt e Michael.