Jose Mourinho nuk është më trajneri i Romës, që doli me kocka të thyera nga ndeshja në San Siro ndaj Milan. Special One u shkarkua në fund të një jave që tashmë kishte nisur keq me humbjen në derbin ndaj Lacios për çerekfinalet e Kupës së Italisë. Verdhekuqtë e gjejnë veten në vendin e nëntë në renditje dhe tani është e qartë se fajtori është identifikuar te Josè Mourinho. E tani portugezi është në shënjestër të të gjithëve, përfshirë gazetarin dhe drejtorin e Sportitalia Michele Criscitiello. Në editorialin e tij ai e ka ‘masakruar’ teknikun portugez.
SULMI I ASHPËR I CRISCITIELLO
“Marrëdhëniet fillojnë dhe mbarojnë dhe nuk është ofendim të thuash që deri tani Pioli dhe Milan i kanë thënë dhe i kanë dhënë gjithçka njëri-tjetrit”, nisi gazetari në editorialin e tij, duke u ndalur më pas tek situata e Romës: “E njëjta gjë vlen edhe për Jose Mourinho te Roma. Madje, ata nuk i thanë asgjë njëri-tjetrit, pavarësisht se prej vitesh kishte një vello të pajustifikuar dashurie dhe respekti ndaj portugezit. Mourinho është i pambrojtshëm. I dhanë fillimisht çelësat e Trigorias dhe më pas të qytetit. Nga njerëzit u trajtua si një trajner fitues në këtë klub. Kritikoheshin dhe shkarkoheshin drejtuesit, lojtarët ofendoheshin por askush nuk guxonte të thoshte gjysmë fjalë për trajnerin, prej vitesh”.
Lexo më tej: Tërmet në Romë, shkarkohet Jose Mourinho: “I nevojshëm një ndryshim i menjëhershëm”
“Historia e Conference League nuk mbante më – vazhdoi Criscitiello -. Ekipi i ndërtuar dhe rindërtuar shumë herë, zgjedhje të aprovuara në merkato. E sot Roma nuk ka arritur asgjë dhe mbi të gjitha nuk ka një pasuri lojtarësh. 900 milionë të shpenzuara vitet e fundit nga pronarët amerikanë për. …asgjë. Kishte ardhur koha për një ndryshim. Ata e trajtuan Petrachi si një leckë dhe në vend të kësaj ai kishte intuitën e duhur. Për shembull, zgjedhjen e De Zerbi në pankinë”.