Spalletti vazhdon me deklaratat e tij që krijojnë debate, polemika, por edhe i bën njerëzit të buzëqeshin. Tekniku i kombëtares së Italisë vazhdon të hedhë dritë mbi të kaluarën e tij dhe eksperiencat si trajner, kur ka drejtuar në klube si Roma, Inter dhe Napoli. Detaje të reja mbërrijnë në disa episode që e kanë bërë, sipas tij, shumë më të fortë.
NJË FALEMINDERIT PËR WANDA NARA
Gjatë fjalimit të tij në World Meeting on Human Fraternity, i mbajtur në CONI, Spalletti fillimisht foli për të kaluarën e tij te Napoli: “I fal të gjithë, por nuk harroj”. Më pas ai iu referua një situate që e bëri atë më të fortë. Luciano Spalletti ishte trajner i Inter nga viti 2017 deri në vitin 2019, ku megjithatë nuk arriti rezultatet e dëshiruara. Në skuadrën e tij si sulmues kryesor ishte Mauro Icardi, i cili krijoi jo pak probleme brenda klubit për shkak të bashkëshortes Wanda Nara, që ishte edhe menaxherja e tij.
Lexo më tej: Wanda Nara e tutat e Juventus: detaji sensacional tërbon tifozët e Inter
Argjentinasja e famshme ishte një nga arsyet që çoi në divorcin mes klubit dhe sulmuesit, për shkak të ndërhyrjes së saj në marrëdhëniet kontraktuale dhe qëndrimit të saj duke bërë gjithmonë kërkesa në rritje. E Spalletti, pavarësisht gjithçkaje, e falënderoi.
“MË BËRI MË TË FORTË”
“Rasti Wanda Nara, por edhe rasti Totti, më bënë më të fortë. Vëllai im më thoshte gjithmonë se po bëja një punë të shkëlqyer. Është t’i kesh të gjithë kundër teje, që të bën të vetëdijshëm për karakterin tënd dhe të tregon se kush je”.