Donald Trump flirtoi me idenë e të qenit president për tre mandate, një shkelje e qartë e kushtetutës së SHBA-së, gjatë një fjalimi bombastik për “Shoqatën Kombëtare të Pushkës” (NRA). Në këtë fjalim ai u zotua të anulojë masat e sigurisë së armëve që u ndërmorën gjatë administratës Biden.
“E dini, Franklin D. Roosevelt 16 vjet, gati 16 vjet. Ai ishte katër mandate. Nuk e di, a do të konsiderohemi me tre mandate? Apo me dy mandate?” tha ish-presidenti dhe kandidati kryesor presidencial i republikanëve në konventën vjetore të organizatës në Dallas, duke bërë që disa nga turma të bërtisnin “tre!”.
Trump ka folur për një mandat të tretë në komentet e kaluara, madje duke përmendur një presidencë të zgjatur gjatë fushatës në 2020. Ai gjithashtu është përpjekur të distancohet nga kjo ide, duke i thënë revistës Time në prill: “Unë nuk do të isha fare në favor të saj. Kam ndërmend të shërbej katër vjet dhe të bëj një punë të shkëlqyer”.
Lexo më tej: Përballja e tyre e parë në studiot televizive, Biden dhe Trump debate më 27 qershor dhe 10 shtator
Amendamenti i 22-të, i cili u miratua pas mandatit të katërt të Franklin Delano Rosvelt, e kufizon presidencën në dy mandate.
Në fjalimin e tij në “Shoqatën Kombëtare të Pushkës”, Trump foli për abortin, emigracionin dhe kritikoi Robert F Kennedy Jr si pjesë e “të majtës radikale”. Ai gjithashtu u ankua për çështjet e shumta penale kundër tij, duke përfshirë një urdhër për të ‘qepur gojën’, që e ndalon atë të komentojë për dëshmitarët në gjyqin e tij penal në qytetin e Nju Jorkut.
Trump ka miratimin e NRA-s, por organizata kohët e fundit është zhytur nga fatkeqësitë ligjore dhe financiare dhe nuk është aq forcë e madhe në politikën amerikane siç ka qenë dikur.
NRA po mban konventën e saj më pak se tre muaj pasi ish-udhëheqësi i saj afatgjatë Wayne LaPierre, si dhe drejtues të tjerë të grupit, u vunë përgjegjës në një padi të përqendruar në shpenzimet e mëdha të organizatës.
Trump, i cili tha se kishte dëgjuar që pronarët e armëve “nuk votojnë”, i shtyu anëtarët e NRA-së të dilnin në votime në nëntor: “Le të jemi rebelë dhe të votojmë këtë herë, në rregull?”
Administrata e Biden ka punuar për të frenuar dhunën me armë, duke përfshirë një mori veprimesh ekzekutive dhe hapjen e zyrës së parë federale për të parandaluar dhunën me armë.
(Biden punon fort për masa kundër armëve)
Biden ka punuar gjithashtu të zgjerojë kontrollet e personave që duan të blejnë armë dhe t’i japë fund një zgjidhjeje që lejon shitjet e armëve të zjarrit pa kontrolle të blerësit, përveç dyqaneve tradicionale.
“Nëse regjimi i Bidenit merr edhe katër vite të tjera, ata do të vijnë për armët tuaja”, tha Trump.
Vetëm 12% e amerikanëve besojnë se ligjet e armëve duhet të lirohen, ndërsa 56% thonë se duhet të ashpërsohen dhe 31% pohojnë se duhet të mbahen siç janë tani për tani, sipas një sondazhi të tetorit të kryer nga Gallup.
The Guardian, përshtati në shqip ©LAPSI.AL