Në rrjetet sociale ka qarkulluar së fundmi një njoftim për protestë për lirimin e reperit Noizy dhe që të mos ekstradohet në Kosovë.
Menaxheri i tij, Ermir Gjyzeli, reagoi përmes një statusi në rrjetet sociale, ku falenderoi njerëzit për mbështetjen, por shtoi se nuk do të ndërmerret një organizim për asnjë protestë.
“Dje nëpërmjet mediave u informuam se do të organizohej sot një protestë para Ministrisë së Drejtësisë për lirimin e Rigelsit (Noizy-t). Duam të informojmë fansat e Noizy-t, publikun e gjerë dhe mediat se as familja e Noizy-t, as stafi menaxherial, nuk kanë ndërmarrë organizimin e asnjë proteste”, u shpreh ai.
Gjyzeli vijoi: “Ne jemi në një proces gjyqësor dhe do të ndjekim vetëm rrugën ligjore për zbardhjen e së vërtetës dhe pastrimin e baltës mbi emrin e Noizy-t. Duam të falenderojmë përzemërsisht fansat dhe kolegët e Noizy-t për mbështetjen ndaj tij në këtë situatë absurde padrejtësie. Punë të mbarë të gjithëve atyre që po punojnë drejt të vërtetës”.
Noizy ishte shpallur në kërkim nga policia e Kosovës, për shkak të një sherri të ndodhur në Pejë, ku është dhunuar Medi Iseni. Së bashku me reperin është arrestuar edhe DJ Crax.