Lija e majmunit, OBSH shpall emergjencën ndërkombëtare

Organizata Botërore e Shëndetësisë ka shpallur gjendjen e emergjencës ndërkombëtare shëndetësore pas rritjes së rasteve të lisë së majmunëve. Deklarata u bë nga Drejtori i Përgjithshëm i OBSH-së, Tedros Adhanom Ghebreyesus, pasi komiteti i urgjencës i OBSH-së u mblodh për të vlerësuar situatën.

Të martën në Afrikë u shpall gjendja e jashtëzakonshme nga Qendra Afrikane për Kontrollin dhe Parandalimin e Sëmundjeve, e cila i kishte kërkuar komunitetit ndërkombëtar të kontribuonte për mobilizimin e 2 milionë vaksinave. BE-ja iu përgjigj menjëherë apelit të bërë. Brukseli njoftoi se do të blejë dhe dhurojë 175 420 doza të vaksinës MVA-BN për kontinentin afrikan. Është i vetmi preparat kundër lisë i miratuar nga FDA dhe EMA.

“Sot u mblodh komiteti i urgjencës dhe më informoi se situata përbën një emergjencë të shëndetit publik me shqetësim ndërkombëtar, unë e pranova këtë këshillë”, – tha drejtori i OBSH-së, duke nënvizuar se “një përgjigje e koordinuar ndërkombëtare është thelbësore për të ndaluar këto epidemi dhe për të shpëtuar jetë”.

“Zbulimi dhe përhapja e shpejtë e një forme të re të sëmundjes në pjesën lindore të Republikës Demokratike të Kongos dhe zbulimi i saj në vendet fqinje si dhe rreziku i përhapja e mëtejshme në Afrikë dhe më gjerë janë shumë shqetësuese”, – tha Ghebreyesus. Kësaj i shtohen edhe “epidemitë e tjera të llojeve të tjera të lisë në pjesë të tjera të Afrikës”.

Krahas donacionit të BE-së, kompania farmaceutike Bavarian Nordic ka vendosur të kontribuojë me 40 mijë doza shtesë vaksine të cilat do t’i dhurojë. Vaksinat e dhuruara do të shpërndahen nga CDC e Afrikës bazuar në nevojat rajonale. “Sëmundja është raportuar në Republikën Demokratike të Kongos për më shumë se një dekadë”, – tha drejtori i përgjithshëm i OBSH-së. “Vitin e kaluar rastet e raportuara u rritën ndjeshëm, por këtë vit numri i rasteve të raportuara tashmë ka tejkaluar totalin e vitit të kaluar, me më shumë se 14 mijë infeksione dhe 524 vdekje.”

Shqetësues i veçantë është një lloj i ri i virusit, i quajtur Clade 1b. Ky lloj po përhapet me shpejtësi në Republikën Demokratike të Kongos. Duket se përhapet kryesisht përmes marrëdhënieve seksuale dhe zbulimi i tij në vendet fqinje është veçanërisht shqetësues. Gjatë muajit të kaluar, rreth 90 infeksione për shkak të llojit 1b të virusit janë raportuar në 4 vende fqinje që nuk e kanë raportuar kurrë më parë këtë sëmundje: Burundi, Kenia, Ruanda dhe Uganda.

OBSH ka hartuar tashmë një plan reagimi për Afrikën, i cili kërkon një investim fillestar prej 15 milionë dollarësh, nga të cilat 1.45 milionë tashmë janë shpërndarë. OBSH u ka kërkuar gjithashtu prodhuesve të vaksinave që të aplikojnë për përfshirjen e vaksinave anti-mpox në listën e barnave të urgjencës. Kjo do të “përshpejtojë aksesin në vaksina për vendet me të ardhura të ulëta që nuk kanë lëshuar ende miratimin e tyre kombëtar” dhe “gjithashtu do të lejojë partnerët, si Gavi dhe Unicef, të prokurojnë vaksina për shpërndarje”. ©LAPSI.al