• |
ide | kryesore

Del ekspertiza/ Çfarë u mori jetën 4 turistëve rusë në Qerret

-Instant, Arkiva, Lajme, Të fundit

Humbja e jetës së 4 turistëve rusë, Natalia Burenkova 58 vjeçe, Sergei Burenkov, 60 vjeç, Nikita Belousov, 37 vjeç dhe Ekaterina Burenkova, 31 vjeçe në një hotel luksoz në zonën e Qerretit në Kavajë, vazhdon ende të jetë e mbuluar nga misteri. Ngjarja ndodhi mbrëmjen e 15 tetorit 2021, në pishinën e mbyllur të hotelit.


Rreth 45 ditë nga ngjarja shokuese, Instituti i Mjekësisë Ligjore ka mundur të përcaktojë shkakun fillestar të humbjes së jetës së anëtarëve të familjes ruse që kishte zgjedhur Shqipërinë për të pushuar. Emisioni “Në shënjestër” në “News24” i gazetares Klodiana Lala ka zbardhur disa detaje mbi shkaqet e vdekjes së 4 turistëve. Sipas ekspertizës mjeko-ligjore, “në trupat e viktimave, u konstatua prania e monoksidit të karbonit në masën mbi 75%”.


Ekspertiza ka rrëzuar dyshimet e ngritura më herët, se vdekja mund të ishte shkaktuar nga përdorimi i tepruar i klorit. Një kompani e certifikuar ndërkombëtarisht e ka rrëzuar këtë pistë, ndonëse institucionet u përplasën mes tyre për kryerjen e këtyre ekspertizave me argumentin se kampionët e ujit dhe të klorit për t’u ekzaminuar nuk ishin marrë në formën e duhur ligjore.

Ekspertiza e kryer ka rezultuar se rusët nuk kanë pasur ndonjë reaksion apo helmim nga ushqimi që mund t’u shkaktonte atyre vdekjen.

Por edhe pse Mjekësia Ligjore ka përcaktuar shkakun e vdekjes së katër rusëve, duket se Prokuroria nuk është e bindur për shkakun e vërtetë të humbjes së jetës së tyre.

Për këtë arsye organi hetues ka thirrur në ndihmë Ministrinë e Mbrojtjes. Dhe më konkretisht Shërbimin Sekret të Ushtrisë, me qëllim për të kryer një eksperiment hetimor në të njëjtat kushte që ka ndodhur ngjarja. Ku përmes këtij eksperimenti do të duhet të provohet nëse dioksidi i karbonit, është shkaktuar në ajër si pasojë e keqfunksionimit të kaldajës në hotel dhe mungesës së sistemit si duhet të ventilimit, apo për arsye të tjera.

Është ky eksperiment që do të mund të përcaktojë përfundimisht shkakun e vërtetë të vdekjes së 4 turistëve rusëve. Si edhe për t’i dhënë fund misterit që mbulon ende humbjen e jetës së tyre. /BW

4 Comments

  1. Kaldaja prodhon monoksid karboni jo dioksid..
    Nuk e paska bo kriminalistika ekspertizen e sistemit te ngrohjes dhe ventilimit?

Lini një Përgjigje

Adresa juaj email s’do të bëhet publike.

Kthehu