“Edhe në miqësoren e parë te Partizani ka fituar ndaj Teutës, ndoshta duhet të vijmë më shpesh të luajmë në Durrës se mund të duket fatsjellëse”. Giovanni Colella shijon vendin e parë në renditje me një 1-4 në Niko Dovana që nuk lë asnjë dyshim. Partizani i tij ka rigjetur edhe golat në transfertë, duke e mbyllur fazën e parë të kampionatit në krye të renditjes. Shkon keq e më keq për Teutën. Skuadra e Shkëmbit fundoset sërish, e parafundit me 7 pikë.
Të kuqtë e nisën ndeshjen praktikisht në avantazh me golin e Hotit në minutën e 2’. Teuta u përgjigj me barazimin provizor të Grudës në minutën e 16’, por nuk e mbajti dot ritmin. Kryeqyetasit rimorën avantazhin pas 6 minutash me Da Silvan, përpara se Hoti të kompletonte dygolëshin e tij në të 24’. Vendasit u përpoqën të reagonin, por në minutën e 75’ Skuka i dha goditjen përfundimtare. “Duhet të vazhdojë të krijojmë raste dhe shënojmë gola, kjo është e rëndësishme – shpjegoi italiani -. Sot ka bërë Hoti dy gola dhe shpresoj që në ndeshjen tjetër të jetë Cara se e meriton. Pastaj të fitosh 4-1 jashtë, nuk është vetëm një rezultat i mirë, por një tregues që jemi aty”.
Lexo më tej: Mjekët e Partizanit kalojnë kangjellat të shpëtojnë tifozin (VIDEO)
OBJEKTIVI
Partizani vazhdon të udhëheqë kampionatin me 19 pikë, në përfundim të javës së 9 që mbyll edhe fazën e parë të Superiores. Për Colella sigurisht që është një arritje, por është vetëm një hap drejt një objektivi që fitohet në qershor: “I lumtur jam kur fitoj ndonjë gjë dhe tani nuk kam fituar asgjë. Sa i përket faktit të golit nuk kam qenë asnjëherë i shqetësuar. Një skuadër që godet shumë portën, golat herët a vonë do i bëjnë. Pastaj mendoj se jemi të kënaqur që jemi të parët në fund të fazës. Por mendoj se kjo ka pak rëndësi për momentin”.