Nuk po shkojnë mirë gjërat për Kombëtaren U-21 të Shqipërisë, e thirrur në çështje të mbrojë vendin e parë në grupin e saj eliminator drejt Europianit 2025. Kuqezinjtë e rinj nisën këtë të diel grumbullimin dhe përgatitjet zyrtare në Durrës, për ndeshjet kualifikuese. Të besuarit e Alban Bushit do të luajnë ndaj Rumanisë U-21 (17 nëntor) dhe Malit të Zi U-21 (21 nëntor). E sikur të mos mjaftojë fakti që të dyja ndeshjet janë në transfertë, Bushi duhet të bëjë tashmë edhe pa mbrojtësin Ermis Selimaj.
Departamenti i Komunikimit në FSHF bën me dije se mbrojtësi do të mungojë për shkak të një dëmtimi. Kështu, Selimaj e ka të pamundur të jetë pjesë e skuadrës kuqezi në dy transfertat e rëndësishme ndaj Rumanisë dhe Malit të Zi. Në këtë pikë, trajneri Bushi ka vendosur të thërrasë lojtarin e Laçit, Agan Mjaki.
Lexo më tej: Nuk morën dot pasaportën shqiptare, Bushi humbet tre lojtarë: ndryshon lista e Kombëtares U-21
Shqipëria U-21 ndodhet në Grupin E bashkë me Rumaninë, Zvicrën, Finlandën, Malin e Zi dhe Armeninë. Kuqezinjtë e rinj, ashtu si të rriturit, renditen në vendin e parë të grupit të tyre eliminator. Skuadra e Bushit ka tre fitore, ndaj Rumanisë U-21, Malit të Zi U-21 dhe Armenisë U-21 dhe vetëm një humbje, atë ndaj Finlandës U-21.
Me 16 nëntor, Kombëtarja U-21 do të udhëtojë drejt Rumanisë, ku një ditë më pas do të luajë ndaj vendasve ndeshjen zyrtare. Ndërsa më 21 nëntor ata do të luajnë ndaj Malit të Zi.