Autoritetet izraelite kanë mbyllur një transmetim të drejtpërdrejtë nga media amerikane Associated Press (AP) dhe kanë sekuestruar pajisjet e kamerave. Izraeli akuzon organizatën për shkeljen e ligjeve, sepse i jep materiale stacionit të lajmeve Al Jazeera.
Incidenti ndodhi në qytetin Sderot, në kufirin me Gazën, nga ku AP ka ofruar një pamje pothuajse të vazhdueshme të drejtpërdrejtë të horizontit verior të Gazës gjatë gjithë luftës. Zyrtarë nga Ministria e Komunikimeve kanë dorëzuar agjencisë një urdhër të nënshkruar nga ministri për ndalimin e transmetimit. Një urdhër verbal i njëjtë ishte lëshuar më parë të enjten e kaluar, të cilin AP refuzoi ta ndiqte.
Duke komentuar incidentin, Associated Press tha se “dënon në termat më të fortë veprimet e qeverisë izraelite për të mbyllur transmetimin tonë të gjatë të drejtpërdrejtë që tregon një pamje në Gaza dhe sekuestron pajisjet e AP. Mbyllja nuk u bazua në përmbajtjen e furnizimit, por në një përdorim abuziv nga qeveria izraelite të ligjit të ri të transmetuesve të huaj të vendit. Ne u bëjmë thirrje autoriteteve izraelite të kthejnë pajisjet tona dhe të na mundësojnë të rivendosim menjëherë transmetimin tonë të drejtpërdrejtë, në mënyrë që të mund të vazhdojmë të ofrojmë këtë gazetari të rëndësishme vizuale për mijëra media në mbarë botën.”
Sipas një deklarate të raportuar nga The Times of Israel, Ministria e Komunikimit tha se do të vazhdojë të marrë çfarëdo veprimi zbatues që kërkohet për të kufizuar transmetimet që dëmtojnë sigurinë e shtetit. Al Jazeera u ndalua kohët e fundit të operonte brenda Izraelit, pas një ligji të ri që lejon qeverinë të ndalojë çdo transmetues që konsideron se është i dëmshëm për sigurinë kombëtare. Zyrat e Al Jazeera në Jerusalemin lindor u bastisën dhe pajisjet u konfiskuan disa orë pas miratimit të ligjit.
Lidhur me vendimin e Izraelit ka reaguar edhe Shtëpia e Bardhë përmes një deklarate të sekretares së shtypit Karine Jean-Pierre. Ajo se Shtëpia e Bardhë po ndiqte raportimet se zyrtarët izraelitë kapën një kamerë dhe pajisje transmetimi nga Associated Press në jug të Izraelit.
“Natyrisht, kjo është shqetësuese. Dhe kështu ne duam ta shqyrtojmë atë. Por ne e kemi pasur gjithmonë të qartë rëndësinë e punës që bëni të gjithë ju, punës që bëjnë gazetarët,” tha Jean-Pierre për gazetarët