Fitorja 5-1 e kombëtares gjermane ndaj Skocisë dhuroi spektakël. Në ndeshjen hapëse nuk munguan as VIP-at në stadium. Kishte një grup të famshmish mes 67 mijë tifozëve në stadiumin e Mynihut. Mes publikut u pa çifti Heidi Klum dhe Tom Kaulitz të cilët kishin lyer plotësisht fytyrën me ngjyrat e Gjermanisë.
Një ditë pas finales së “German’s Next Top Model”, ata u nisën herët të dy nga Këlni për në Mynih. Ata e kanë kaluar ditën aty, ndër të tjera, në fabrikë birre, siç e kanë ndarë në Instagram.
Në stadium ishte edhe elita ndërkombëtare e futbollit, si presidenti i FIFA-s, Gianni Infantino dhe shefi i UEFA-s, Aleksandar Ceferin. Sigurisht që në hapje nuk munguan as trajnerët legjenda Sir Alex Ferguson dhe José Mourinho.
Të pranishëm ishin edhe trajneri i ri i Bayern, Vincent Kompany me gruan e tij Carla. Anëtari i bordit mbikëqyrës të Bavarisë, Karl-Heinz Rummenigge zuri një vend pranë shefit të Red Bull, Oliver Mintzlaff.
Përveç të gjithë personazheve të famshëm, në stadium kishte edhe një sërë politikanësh. Midis tyre ishte Presidenti Federal, Frank-Walter Steinmeier, Ministri i Mbrojtjes Boris Pistorius, Ministrja e Brendshme Nancy Faeser dhe Kryeministri i Bavarisë Markus Söder.
U panë edhe ish-kancelari Gerhard Schröder që shoqërohej nga gruaja e tij So-yeon Schröder-Kim. Në stadium ishin edhe legjenda e tenisit Boris Becker dhe e dashura e tij Lilian de Carvalho Monteiro. ©LAPSI.al