Policia italiane ka çmontuar një bandë të trafikimit të drogës në Itali. Grupi trafikant i përbërë nga shqiptarë dhe italianë, në pamje të parë dukej se ishin pronarë të një koncesioni makinash, por pas kësaj fshihej aktiviteti i tyre i vërtetë i drogës.
Banda u shkatërrua me operacionin “Double Game” të Guardia di Finanza, të koordinuar nga DDA, Drejtoria e Qarkut Antimafia e Ankonës. Në pranga përfunduan 12 persona, mes të cilëve “kokat” drejtuese të organizatës kriminale, dy vëllezërit shqiptarë Etmond dhe Klenis Qevani, 47 dhe 39 vjeç, banues në Porto Sant’Elpidio dhe pronarë të një pike shitje makinash, shkruajnë mediat italiane.
Të dy, së bashku me gjashtë anëtarë të tjerë të organizatës, kërkuan dhe morën një gjykim të shkurtuar, procedurë e cila parashikon uljen e një të tretës së dënimit. Në vend të kësaj, katër anëtarët e tjerë të klanit kërkuan një marrëveshje. Në përfundim të gjykimit Klenis Qevani u dënua me 10 vjet e 8 muaj, ndërsa Etmond “Renato” Qevani u dënua me 7 vjet burg.
Të arrestuarit e tjerë u dënuan përkatësisht:
Kleon Mema, 39 vjeç, 3 vjet vjet;
Ferdinando Bongiovanni, 62 vjeç, 5 vjet;
Arjan Ndoka, 49 vjeç, 5 vjet;
Geri Skilja, 29 vjeç, 3 vjet e 4 muaj;
Elidon Shkalla, 28 vjeç, 5 vjet;
Adele D’Avino, 1 vit.
Operacioni startoi në agimin e 29 qershorit 2023 në provincat Fermo, Macerata, Ancona, Pesaro-Urbino dhe Frosinone, si dhe në Shqipëri, Belgjikë dhe Spanjë. Të arrestuarit ishin përgjegjës në cilësi të ndryshme për organizimin dhe trafikimin ndërkombëtar të kokainës dhe hashashit. Hetimi kompleks, i nisur nga Porto Sant’Elpidio, pas sekuestrimit të 20 kg kokainë, kishte bërë të mundur rindërtimin e veprimtarisë dhe strukturës së një grupi kriminal me bazë operacionale në qytetin në bregdetin Fermo dhe me pasoja në territorin italian dhe evropian.
Megjithatë, hapat e parë të operacionit nisën në vitin 2020, kur, si pjesë e një tjetër hetimi të kryer nga Gico, figura e një ish-bashkëpunëtor të drejtësisë me origjinë nga Campania, përgjegjës për një grup të madh tregtarësh italianë droge, doli aktive në të gjithë Marche. Prej aty hetuesit kishin rindërtuar zinxhirin e furnizimit me drogë, kryesisht kokainë, e cila, falë një organizate të fuqishme shqiptare, importohej rregullisht. Organizatorët e grupit kriminal ishin në Porto Sant’Elpidio dhe ishin dy vëllezërit Qevani: Klenisi, i cili kishte ndjerë rrezikun, kishte arritur të arratisej, por ishte kapur në Belgjikë, ndërsa Etmondi ishte arrestuar. Ata shfrytëzonin biznesin e shitjes së makinave për të transportuar kokainë dhe lëndë të tjera narkotike.