Një shtetas shqiptar 29-vjeçar është arrestuar nga policia italiane, e cila i ka gjetur mbi 16 kilogramë kοkαinë. Teksa ishin të angazhuar në një shërbim kontrolli territorial, në Ponte San Giovanni periferi e Perugia, policët e skuadrës së lëvizshme ndaluan për kontroll një mjet që po ecnin me ritme të paqëndrueshme.
Shoferi dukej mjaft nervoz dhe i shqetësuar duke nxitur oficerët të kryenin një kontroll personal dhe në makinë. Kontrolli i makinës ka bërë të mundur gjetjen e një fundi fals të krijuar poshtë dyshemesë së bagazhit. Në brendësi të ndarjes u gjetën dhe sekuestruan 15 blloqe me lëndë narkotike, të cilat nga hetimet teknike të punonjësve të kabinetit të policisë shkencore të krahinës rezultuan se ishin kokainë.
Në dritën e sasisë së madhe të lëndës narkotike të gjetur, u kontrollua edhe shtëpia e shqiptarit. I shoqëruar në komisariat, 29-vjeçari, pa precedentë penalë, u arrestua për veprën penale të posedimit të lëndëve narkotike për qëllime shitjeje. Me urdhër të prokurorit publik, ai u mbajt në burgun Perugia-Capanne, në pritje të seancës së masës së sigurisë. ©ANSA, LAPSI.al