Gjatë ditës së sotme nëntë shtetas nga Nepali janë zhdukur pa lënë gjurmë në qytetin e Durrësit.
Sipas policisë ata kishin mbërritur në vendin tonë për t’u imbarkuar si marinarë në një anije tregtare.
Pas denoncimit të bërë nga administratori i agjencisë së lundrimit, të huajt janë shpallur në kërkim nga policia e Durrësit.
Burime të policisë bënë të ditur për “t.ch” se më 9 mars shtetasit nga Nepali janë sistemuar në një hotel në Durrës, pas futjes në vendin tonë përmes pikës kufitare të Rinasit.
Mëngjesin e së shtunës, më 10 mars, ata kanë dalë nga hoteli e nuk janë kthyer më. Kjo ka alarmuar personelin e hotelit dhe agjencisë, që ka bërë dhe denoncimin. “Të zhdukurit” janë larguar nga hoteli pa marrë bagazhet, gjë që ka shtuar dyshimet mbi fatin e tyre.