Gjatë muajit tetor, çmimet e ushqimeve dhe qiratë pësuan rritjen më të madhe. Sipas INSTAT edhe perimet kanë pasur rritje në treg, e lidhur kjo edhe me përfundimin e prodhimeve të verës. Ndërkohë që edhe qiratë janë bërë më të shtrenjta për shkak të kërkesës së rritur nga studentët në nisjen e vitit akademik.
Tetori ka qenë më i shtrenjtë për xhepat e shqiptarëve si pasojë e rritjes së çmimeve dhe të qirave.
Të dhënat e INSTAT tregojnë se ushqimet dhe pijet joalkoolike kanë vijuar të kenë rrijten më të madhe, krahasuar kjo me nëngrupet e tjera.
Perimet kanë kushtuar rreth 11.5% më shtrenjtë, pasuar nga nëngrupet “vajra dhe yndyrna” si dhe “qumësht, djathë dhe vezë”.
Shtrenjtimi i perimeve gjatë muajit tetor lidhet me uljen e prodhimit vendas dhe shtimin e importit, ndërsa parashikohet që një tendencë e tillë të forcohet në muajt në vijim.
Pas ushqimeve, rritje çmimi kanë pësuar edhe qiratë, lëndët djegëse dhe energjia elektrike, ku peshën kryesore e mbajnë qiratë.
Nisja e vitit akademik në tetor ka shtuar kërkesën për banesa me qira, duke ndikuar në këtë mënyrë në shtrenjtimin e qirave krahasuar muajin shtator, por edhe me të njëjtin muaj të një viti më parë.
Pavarësisht kësaj, rritja e çmimeve ka qenë e moderuar, duke ndikuar në uljen e inflacionit në 1.9%, niveli më i ulët për këtë vit.
Ky nivel inflacioni vlerësohet nën intervalin e poshtëm të Bankës së Shqipërisë, ndërkohë që objektivi që parashikohet të arrihet deri në vitin 2020 është 3%.