I pyetur nga gazetarët në lidhje me ndonjë arrestim të mundshëm të Kryetarit të Bashkisë së Durrësit, Vangjush Dakos, ministri i brendshëm Sandër Lleshaj u shpreh se Policia e Shtetit do të zbatojë vetëm ligjin në rast se vjen një urdhër arresti nga Prokuroria.
“Policia nuk merr udhëzime as nga Kryeministri as nga ministri, Policia merr udhëzime nga ligji”.
I pranishëm në një event në Komisariatin e Policisë Rrugore në “Kinostudio”, Lleshaj hodhi poshtë pretendimet e opozitës për deklarata politike para protestave të organizuara prej saj, ndërsa shtoi se nuk e konsideron si masë drastike heqjen e valëve të telefonisë celulare, siç ndodhi gjatë protestës së fundit të opozitës.
“Kjo nuk është masë drastike kur bëhet në shërbim të sigurisë dhe mbarëvajtjes së protestës”, tha Lleshaj.