• |
ide | kryesore

Shtohet presioni ndaj Kosovës, Macron letër Thaçit: Hiqni taksën, ndryshe nuk rinis dialogu me Serbinë

Lajme, Të fundit

Presidenti i Francës, Emmanuel Macron, me rastin e 12 vjetorit të Pavarësisë së Republikës së Kosovës, i ka shkruar letër kreut të shtetit, Hashim Thaçi, të cilin e ka uruar në emër të popullit francez.

Macron në këtë letër gjithashtu ka shprehur gatishmërinë që bashkë me kancelaren gjermane, Angela Merkel dhe Përfaqësuesin e Lartë të BE’së, Josep Borell , të organizojë një Samit në Paris me qëllim të rinisjes së dialogut Kosovë-Serbi.

Kreu i shtetit francez ka thënë se për të ndodhur një gjë e tillë, Kosova duhet të heq taksën ndaj produkteve me origjinë nga Serbia dhe Bosnja e Hercegovina.

Gjithashtu Macron ka thënë se Serbia duhet të ndalojë fushatën kundër pavarësisë së Republikës së Kosovës.

Letra e plotë:

Me rastin e festës kombëtare të Republikës së Kosovës, jam i lumtur t’ju adresoj, në emrin tim dhe në emër të popullit francez, urimet e mia të sinqerta.

Që prej vitit 2008, dy vendet tona kanë ndërtuar një marrëdhënie miqësie mirëbesimi. Franca qëndron përkrah Kosovës për t’a ndihmuar në tejkalimin e sfidave me të cilat përballet ajo sot, veçanërisht në konsolidimin e shteti të së drejtës, zhvillimin ekonomik dhe shoqëror, në kuadër të strategjisë franceze për Ballkanin Perëndimor të cilin e kam miratuar pranverën e kaluar. Agjencia Franceze e Zhvillimit planifikon të fillojë punën në Kosovë këtë vit. Bashkëpunimi ynë dypalësh mbështet gjithashtu agjendën evropiane të reformës në vend.

Dëshiroj poashtu të përshëndes zhvillimin e qetë të zgjedhjeve legjislative të datës 6 tetor si dhe formimin, tash së voni, të qeverisë së re të Kosovës. Është e rëndësishme që Kosova të vazhdojë përpjekjet e saj për të zbatuar reformat e nevojshme të brendshme dhe që vendosmërisht të angazhohet në kërkimin e arritjes së një marrëveshje me Serbinë.

Siç edhe e kam cekur më 12 nëntor të vitit të kaluar, gjatë Forumit të Paqes në Paris, ju mund të llogarisni në mbështetjen dhe gatishmërinë time për të mirëpritur, në Paris, një samit që bashkon liderët e Kosovës dhe të Serbisë, me Kancelaren gjermane Angela Merkel dhe Përfaqësuesin e Lartë të Bashkimit Evropian për politikë të jashtme dhe siguri, Josp Borrell, për të lehtësuar rifillimin e dialogut. Për këtë priten veprime nga të dy palët: pezullimi nga Kosova i taksës 100% për produktet nga Serbia, Bosnja dhe Hercegovina; dhe pezullimi i fushatës për “ç’njohje” nga ana e Serbisë. Pasi rifillimit të dialogut, është radha e ndërmjetësimit të Bashkimit Evropian, me mbështetjen e Francës, të lehtësojë bisedimet midis dy palëve me synimin e arritjes së një marrëveshjeje gjithëpërfshirëse, përfundimtare dhe të detyrueshme ligjërisht.

Duke përtërirë urimet e mia të ngrohta, ju lus të pranoni, z.President, shprehjen e konsideratës sime më të lartë.

2 Comments

  1. Një gjë nuk po e mar vesh në kërkesat që i bëhen Kosovës me këmbëngulje, që të heq taksën ndaj Serbisë.
    A nuk e paska Kosova të drejtën si një shtet i pamvarur që të vejë “sanksione” ndaj një shteti fqinj që pasi i ka shkaktuar qindra mijëra viktima , vazhdon tja mohojë pamvarësinë ?
    Nuk e ka kërcënuar Kosova Serbinë se do ta sulmojë ate , por ka bërë ate që bëjnë të gjitha shtetet demokratike perëndimore ndaj shteteve agresive.
    Përse fuqitë e mëdha e paskan të drejtën tju venë sanksione ekonomike shteteve agresive si Rusia e Irani, e nuk e paska këtë të drejtë Kosova e ciflitur kur Serbia kërkon të marë teritore të saj me rekurse të fuqishme ekonomike ?
    Nuk e paska këtë të drejtë Kosova sepse është një vend i vogël e i pa fuqishëm ushtarakisht e ekonomikisht krahasuar me Serbinë ?

  2. Ti me duket paske lexuar vetem titullin se permbajtja e letres eshte pozitive: I behet thirrje Serbise te nderprese fushaten per terheqjen e njohjeve te shtetit te Kosoves. Gjithashtu thuhet se brenda vitit çelet agjencia franceze e zhvillimit ne kosove, çka perkthehet ne investime etj.

Lini një Përgjigje

Adresa juaj email s’do të bëhet publike.

Kthehu