Zv.presidentja e Argjentinës, Cristina Fernández de Kirchner, u dënua të martën me 6 vjet burg nën akuzat për një skemë mashtrimi përmes së cilës përvetësoi 1 miliard dollarë duke favorizuar dhënien e projekteve publike ndërsa ishte në pushtet. Asaj gjithashtu i është ndaluar përjetësisht mbajtja e posteve publike. Një trupë gjykuese e përbërë nga tre gjyqtarë e shpalli fajtore zonjën Kirchner për mashtrim, por hodhi poshtë akuzën për drejtimin e një organizate kriminale, për të cilën dënimi mund të ishte 12 vjet burg.
Zonja Cristina Fernández de Kirchner i ka mohuar të gjitha akuzat. Ndaj saj u ngritën akuza se kishte favorizuar në dhënien e kontratave publike një manjat të industrisë së ndërtimit që ka lidhje të ngushta me familjen e saj.
Prokurorët thanë se zonja Fernández i dha padrejtësisht 51 projekte të punëve publike zotit Lázaro Báez. Ai është një manjati ndërtimi dhe aleat i hershëm i saj dhe bashkëshortit të saj Nestor Kirchner. Ky i fundit shërbeu si president nga viti 2003 deri në vitin 2007 dhe vdiq papritur në 2010.
Prokurorët Diego Luciani dhe Sergio Mola thanë se kompania e zotit Báez u krijua për të përvetësuar të ardhurat përmes projekteve publike që tejkalonin kostot e prashikuara dhe në disa raste nuk përfunduan kurrë. Kompania, thonë ata, u zhduk pas 12 viteve në pushtet të familjes Kirchner. Vendimi i plotë i trupës gjykuese do të publikohet të shkurt dhe ka gjasa të apelohet në Gjykatën e Lartë, një proces që mund të zgjasë disa vite. Sidoqoftë, ajo mbetet udhëheqësja e vetme e fraksionit të majtë të lëvizjes Peroniste. Ndaj saj janë ngritur edhe akuza të tjera, përfshirë atë për pastrim parashë ku përfshihen djali dhe vajza e saj. VOA