Një fuoristradë doli nga rruga në ora 04:30 të mëngjesit të sotëm dhe u përplas me bordurën e një karburanti në rrugën Fushë Krujë – Krujë. Në makinë po udhëtonin tre të rinj, të cilët u plagosën rëndë. Njëri prej tyre, Altin Vogli, u nda nga jeta në spitalin e Traumës në Tiranë.
Dy të tjerët, Ilir Gega (shoferi) dhe Dorjan Hifi kanë mbetur të plagosur.
Sipas të dhënave të para të policisë, shkak i aksidentit është bërë shpejtësia e lartë me të cilën udhëtonte Fuoristrada si dhe mungesa e sinjalistikës dhe standartet e dobëta të rrugës.
Mësohet gjithashtu se për të nxjerrë të rinjtë nga makina është dashur ndërhyrja e zjarrfikëseve. Ata të tre janë dërguar në gjendje kritike për jetën në spitalin e Traumës nga dy ambulancat e Krujës dhe Fushë Krujës.