Kryetarja e Bashkisë së Shkodrës, Voltana Ademi, u ka drejtuar një shkresë shkollave të qytetit dhe të gjitha njësive administrative, duke u kërkuar që të mos lejojnë depërtimin në ambientet e brendshme të personave të paautorizuar.
Ademi thekson se shkollat dhe Drejtoria Arsimore Rajonale (DAR) kanë vetëm përgjegjësi për administrimin dhe mirëorganizimin e procesit mësimor, duke përjashtuar menaxhimin e objektit. “Meqenëse objektet shkollore janë asete në pronësi të Bashkisë Shkodër dhe administrohen nga Bashkia Shkodër, këto objekte nuk duhen të aksesohen nga persona dhe institucione të paautorizuara nga Bashkia Shkodër për të hyrë në këto objekte. Nënvizojmë që përgjegjësia juaj është administrimi dhe mirë organizimi i procesit mësimor dhe jo administrimi i objektit.”– shkruhet në kërkesën drejtuar shkollave.
Në Shkodër dhe në disa qytete të tjera të vendit janë shënuar gjatë ditës së sotme përplasje mes forcave policore dhe përkrahësve të opozitës së bashkuar joparlamentare, për lirimin e ambinteve të zëna nga Komisionet Zonale të Administrimit Zgjedhor (KZAZ), ku parashikohej të zhvilloheshin votimet për zgjedhjet e 30 qershorit. Kryebashkiakët nga radhët e Partisë Demokratike dhe të Lëvizjes Socialiste për Integrim kanë kërkuar respektimin e dekretit të presidentit të Republikës, Ilir Meta, për shtyrjen e zgjedhjeve vendore.