Një gol i shënuar nga Shtubina në minutën e 66, ka mjaftuar për ti dhënë tre pikë shkëputje Vllaznisë, që me fitoren kundër Skënderbeut ngjitet katër pikë larg kreut. Bardhekuqtë kërkonin të harronin shpejt 1-0 e minutës së fundit në Durrës një javë më parë dhe inspirimi i dyshes Gripshi-Bregu ishte ai i duhuri, vetëm se për fat të keq të sulmuesve, të njëjtën ndjesi kishte edhe Sherri. Jonuz, me inteligjencën e krijuar nga eksperienca lejoi inisiativën korcare, duke u përpjekur të dilte pa dëme nga presingu vendas, për të më marrë më pas gradualisht kontrollin e lojës, me prezencë të rritur në mesfushë, ku Marku insistonte jo pak edhe drejt portës së Kolicit.
Ritmi i ndeshjes ishte i lartë, si i përshtatet dinamizmit të Gripshit e Bregut, që dhanë përgjigjen për bardhekuqtë në të 41, duke u ndalur edhe një herë nga Sherri, që mbrojti portën, duke i dhënë një shans të ri Vllaznisë për të tentuar fitoren në pjesën e dytë, që e nisën pikërisht aty ku e mbyllën të parën, në sulm, me konkluzionet e kapitenit Lika e të Markut, por pa mundur të thyejnë Kolicin.
Skënderbeu nuk ka më forca të ekuilibrojë ndeshjen dhe mundohet të blindohet prapa, pa i bërë llogaritë me rovjeshatën e Shtubinës, që në minutën e 66 shtangu stadiumin e Korcës. I jashtzakonshëm numri 10 i shkodranëve që nuk i dha asnjë mundësi Koliçit, duke vendosur fatet e ndeshjes, që nuk ndryshuan edhe kur kuqeblutë mbetën me 10 lojtarë në 8 minutat e fundit pas kartonit të dytë të verdhë të Ualusimbi.
23 pikë për Vllazninë, që rikthehet në shinat impresionuese të fillimit të kampionatit, meritë natyrisht edhe e Jonuz. Për korcarët nuk është momenti i duhur, disfata e dytë radhazi e tashmë Daja duhet të bëjë kujdes, sepse është në zonën e playoff.