Kore, flamujt, fishekzjarre dhe bomba tymuese: rreth 5000 tifozë të Inter u mblodhën në sheshin ‘Baretto’ të San Siros, pika e takimit të Curva Nord, për të mbështetur ekipin në derbin e pasdites kundër Milan. Jo shumë larg është grumbulluar edhe një delegacion i tifozëve kuqezinj. Ndalimi i grumbullimeve, i vendosur nga qeveria për të kufizuar përhapjen e Covid, në fakt është harruar krejtësisht nga mbështetësit e dy skuadrve të Milanos dhe distancimi praktikisht nuk ekziston mes tyre. Shumë ende e mbanin maskën, por në fakt rregullat dolën në plan të dytë.
Një festë në dukje, madje edhe me familje dhe fëmijët, në një kohë kur Interi është i pari në renditje dhe po lufton për titull, pikërisht me të dytën e renditur. E kufizuar nga barrierat dhe e kontrolluar në distanca nga policia, ngjarja nuk krijoi probleme, me tifozët që kënduan kore me orë të tëra në pritje të ardhjes së ekipit të Antonio Contes.