“Duhet të shoh ndeshjen pas 2-3 orësh me qetësi, e jam i sigurt që do të gjej ndonjë gabim por si fillim jam i lumtur për ne, fansat, jemi krenarë për mënyrën se si shënuam 6 gola e fituam këtë ndeshje”. Thomas Brdaric mundohet të qetësojë euforinë legjitime pas një fitore të tillë si ajo 6-3 me të cilën Vllaznia e tij likuidoi Dinamon. Një fitore me shumë peshë për skuadrën shkodrane, ndërsa gjashtë golat e shënuar e kanë bërë formacionin e Brdaric të ketë sulmin më të mirë të kampionatit me 13 gola në 5 ndeshje: “I kam thënë lojtarëve që kur jemi të aftë të shënojmë mesatarisht 3 gola në ndeshje, do të jemi të lumtur. Kanë filluar të besojnë në këtë dhe më vjen mirë”.
Në fakt që llogaritë ti dalin teknikut gjerman, të tijtë duhet të kishin shënuar edhe dy gola më shumë në pesë javët e para, por gjithësesi janë aty fare pranë objektivit: “Jam i lumtur me të gjithë golat. Golat më të thjeshtë janë më të mirët. Kemi krijuar sot aq shumë shanse dhe uroj ekipin por sidomos sulmuesit që shënuan sot. Kemi punuar mbi finalizimin, kemi vuajtur disa herë që nuk kemi qenë efektivë, por sot treguam një pamje të mirë dhe sot ishte e shkëlqyer”, përfundoi Brdaric.