Alexandr Dolgopolov ka zgjedhur të armatoset dhe t’i bashkohet rezistencës ukrainase për të mbrojtur vendin e tij nga pushtimi rus. Ish-tenisti, fitues i dy turneve ATP Tour 250 dhe një të ATP Tour 500 në karrierë, njoftoi në rrjetet sociale se ka mbërritur në Kiev dhe është gati për të luftuar. Menjëherë ai postoi një imazh të një jeleku antiplumb, një pushke dhe një helmete, të shoqëruar me një mesazh lakonik: “Dikur kisha raketa dhe korda, tani këtë…”.
Used to be rackets and strings, now this🙄🙏🏻🇺🇦 pic.twitter.com/hdYjMDlMuo
— Alex Dolgopolov (@TheDolgo) March 16, 2022
Dolgopolov zbuloi se kishte iku në Turqi me familjen e tij pak para shpërthimit të konfliktit, nga frika se diçka serioze do të ndodhte. Aty nisi të ushtrohej me pushkën dhe gjithashtu ishte stërvitur nga një ish-ushtar profesionist për rreth një javë: “Unë nuk jam Rambo, por ndihem mjaft komod me armët dhe mund të godas objektivin nga 25 metra distancë 3 herë nga 5, në një ambient të qetë”. Tani, pasi bleu armatimin në Zagreb dhe kaloi kufirin ukrainas nga Polonia, ai ndodhet në kryeqytet: “E vërteta është me ne dhe kjo është toka jonë. Unë do të qëndroj në Kiev deri në fitoren tonë e përtej”.