“Jam shumë i keqardhur për rezultatin, nuk po arrijmë të marrim ftytet e punës. Një nga zhgënjimet më të mëdha që kur kam ardhur te Shqipëria. Më vjen shumë keq më shumë për lojtarët dhe për veten”. Edoardo Reja vetëm si miqësore nuk e ka përjetuar përballjen me Spanjën në Barcelonë e aq më tepër të pranojë një humbje në minutën e 90 pas një performance pozitive si ajo që treguan kuqezinjtë e tij.
Tërbimi i italianit është natyrisht për mënyrën si erdhi humbje, por akoma më shumë për faktin se Jordi Alba mund të ishte në pozicion të parregullt në aksionin final, që solli golin e dytë për skuadrën e Luis Enrique. “E pashë në telefon. Jordi Alba ishte përtej linjës të mbrojtësve. Jam akoma më i nxehur, për golin e dytë. E unë që mendoja që do të na vinin poshtë, por kemi bërë një lojë të mirë. Duke parë si shkoi 90 minutëshi, më vjen vërtet keq, që kemi humbur. Duhet ti bëj komplimente lojtarëve. Nëse i përmirësojmë gjërat e vogla, mund të bëjmë akoma më mirë”, u shpreh Reja në përfundim të ndeshjes, edhe pse tani mendja shkon te Gjoergjia, me të cilën tekniku italian duhet të bëjë llogaritë pas tre ditësh.