Shtylla që u rrëzua në autostradën Tiranë-Durrës mesditën e sotme duke shkaktuar rëndim të qarkullimit të makinave më në fund u zhvendos nga rruga.
Aksidenti ndodhi rreth orës një të drekës. Sipas raportimeve të mëparshme, ku një makinë e parkuar pranë shtyllës u godit nga një makinë tjetër dhe përplasja shkaktoi rënien e shtyllës së amortizuar në autostradë.
OSSH reagoi si më poshtë për ngjarjen.
“Sot rreth orës 12:50, OSSH Durrës është njoftuar nga strukturat e policisë për rrëzimin e një shtylle pranë mbikalimit të këmbësorëve në Shënavlash.
Menjëherë, pas njoftimit, OSSH organizoi punën duke patur parasysh sigurinë teknike, zhvendosi shtyllën dhe pastroi zonën nga telat e rrëzuar në tokë, me ndihmën e policisë.
Shtylla e dëmtuar ka qenë pa tension, e palidhur me rrjetin elektrik. Sakaq Policia, me ndihmën e OSSH po heton mbi shkaqet e incidentit, ndërsa mësohet paraprakisht se nuk ka të lënduar.
OSSH ka ofruar të gjithë suportin e saj për të lehtësuar trafikun, duke pastruar rrugën me qëllim normalizimin e lëvizjes së automjeteve.” – përfundon njoftimi. ©Lapsi.al