Më në fund një fitore. Vllaznia mund të marrë frymë lehtësisht, pas një momenti delikat. Kuqeblutë e teknikut Qatip Osmani kanë mposhtur 0-1 Teutën në “Niko Dovana”, në sfidën e fundit të javës së 14 të Superiores. Vendosi Ildi Gruda, me golin e rëndë të ish-it. Sulmuesi nuk festoi për respekt të tifozerisë që deri sezonin e kaluar e mbështeste, por ndërkohë Teuta është e fundit.
As koha që Martini të kuptonte nëse strategjia e tij mund të funksionionte, sepse Ildi Gruda e ndëshkoi. Në minutën e 4’, ish-sulmuesi i Teutës shënoi golin e shpejtë, që e bëri rrugën të tatëpjetë për shkodranët. Një gol vrastar edhe për moralin e kundërshtarëve, që nuk arritën dot të reagonin. Në fakt, u duk se rezultatin e fillimit e pranuan pa probleme të dy skuadrat, që nuk është se bënë shumë. E kuptueshme për shkodranët që po fitonin, por e pafalshme për durrsakët që kanë vetëm një pikë në 5 ndeshjet e fundit.
Lexo më tej: “Isgandarli më kërkoi ndjesë”: Tetova tregon çfarë ndodhi me sulmuesin, Josa ia vë fajin… Ndrecës
Kuqeblutë provuan disi shumë për të gjetur golin e dytë, ndërsa durrsakët ishin larg pritshmërive. Edhe në pjesën e dytë nuk ndodhi pothuaj asgjë, përvec ndonjë rasti sporadik. Kështu Vllaznia largohet nga zona e ftohtë e mbijetesës, duke u ngjitur në vendin e pestë me 17 pikë. Final Four tani është vetëm një distancë larg, ndërsa Teuta mbetet e fundit me 12 pikë.