Një tërmet goditi Federatën Spanjolle të Futbollit të mërkurën në mëngjes, kur Guardia Civil bastisi zyrat në Las Rozas për të kërkuar dhe sekuestruar dokumente. Synimi ishte marrëveshja ekonomike mes RFEF dhe kompanisë arabe që vepronte si ndërmjetëse për organizimin e Superkupës së Spanjës në Arabinë Saudite. Hetuesit po hetojnë krimet e dyshuara të lidhura me korrupsionin e korporatave, administrimin e gabuar dhe pastrimin e parave gjatë 5 viteve të fundit. Këtu përfshihet kontrata për organizimin e Superkupës në Arabi të nënshkruar nga presidenti i atëhershëm i Federatës, Luis Rubiales, me sipërmarrësin dhe ish-futbollistin Gerard Pique. Për momentin janë bërë shtatë arrestime dhe 5 persona të tjerë janë nën hetim.
Guardia Civil tha se Rubiales nuk ishte në mesin e gjashtë të arrestuarve, por burimet e Associated Press thanë se ish-presidenti, i cili dha dorëheqjen shtatorin e kaluar pasi shkaktoi një skandal ndërkombëtar për puthjen e lojtares së kombëtares spanjolle të femrave, Jenni Hermoso pa konsensusin e saj gjatë ceremonisë së çmimeve të Kupës së Botës për femra në gusht, aktualisht ndodhet jashtë vendit në Republikën Domenikane. Sipas tyre ai është mes pesë personave të tjerë të vendosur zyrtarisht nën hetim. Agjentët kanë kontrolluar shtëpinë e tij në Granada duke kërkuar kontrata dhe dokumente.
Lexo më tej: Puthja e turpshme me Hermoso: Fifa dënon për 3 vjet ish-presidentin e Federatës Spanjolle Rubiales
Rubiales rishikoi formatin e Superkupës së Spanjës në vitin 2020, duke krijuar një mini-turne me katër ekipe dhe duke e zhvendosur garën në Arabinë Saudite si pjesë e një marrëveshjeje që thuhet se vlen 40 milionë euro në vit. Prokurorët hapën një hetim për atë marrëveshje në vitin 2022 pas rrjedhjes së audios midis Rubiales dhe lojtarit të atëhershëm të Barcelonës, Piqué, që lidhej me miliona dollarë komisione, një vlerë marramendëse prej 24 milionë eurosh.
ARRESTOHET NJERIU I BESUAR I RUBIALES
Tomas Gonzalez Cueto, konsulent i jashtëm ligjor i Federatës Spanjolle të Futbollit (RFEF) dhe njeriu i besuar i ish-presidentit Luis Rubiales, ishte mes 7 të arrestuarve sot në operacionin e Gardës Civile të lidhura me kontratat e supozuara të parregullta në pesë vitet e fundit, përfshirë ato për të transferuar Superkupën e Spanjës në Arabinë Saudite, siç konfirmuan burimet hetimore për Efe. Në studion e Gonzalez-Cueto, është nënshkruar në vitin 2019 nga Luis Rubiales dhe Gerard Pique kontrata për transferimin e Superkupës në vendin arab. Në operacionin e koordinuar nga prokuroria kundër korrupsionit dhe krimit të organizuar u arrestuan gjithashtu drejtorët e Shërbimit Ligjor dhe Burimeve Njerëzore të Federatës së Futbollit, Pedro Gonzalez Segura dhe José Javier Gimenez.