Çfarë fsheh vizita e Putin në Korenë e Veriut dhe mesazhi për Perëndimin

Vladimir Putin do të udhëtojë në Korenë e Veriut për një vizitë dy-ditore duke filluar nga e marta, tha Kremlini, në udhëtimin e parë të presidentit rus në Korenë në më shumë se dy dekada. Kjoj është shenja më e fundit e një thellimi të bashkëpunimit mes dy vendeve dhe ka ngritur shqetësim të gjerë ndërkombëtar.

Ky është një udhëtim i rrallë jashtë shtetit për Putinin që nga fillimi i pushtimit të plotë të Ukrainës nga Rusia në vitin 2022 dhe një moment kyç për presidentin e Koresë së Veriut Kim Jong Un, i cili nuk ka pritur një lider tjetër botëror në Phenian, ndër kryeqytetet më të izoluara politikisht të globit, që nga koha e pandemisë Covid-19.

Vizita pritet të çimentojë më tej një partneritet në rritje midis dy fuqive që bazohet në armiqësinë e tyre të përbashkët ndaj Perëndimit dhe nxitur nga nevoja e Putinit për mbështetje në luftën e tij të vazhdueshme kundër Ukrainës.

Lexo më tej: Koreja e Veriut: ‘Absurde’ të mbahet samit i paqes për Ukrainën pa Rusinë 

Pas vizitës së tij në Korenë e Veriut, Putin do të udhëtojë në Hanoi të mërkurën për një tjetër udhëtim dy-ditor. Ky takim shfaq lidhjet e Vietnamit të qeverisur nga komunistët me Rusinë, që ka të ngjarë të acarojë Shtetet e Bashkuara.

SHBA, Koreja e Jugut dhe vende të tjera e kanë akuzuar Korenë e Veriut se ka ofruar ndihmë të konsiderueshme ushtarake për Rusinë muajt e fundit, ndërkohë që vëzhguesit kanë ngritur shqetësime se Moska mund të shkelë sanksionet ndërkombëtare për të ndihmuar në zhvillimin e programit ushtarak satelitor të Koresë së Veriut. Të dy vendet kanë mohuar eksportet e armëve nga Koreja e Veriut tek Rusia.

Udhëtimi i Putin i kthen Kim atë që ky i fundit bëri shtatorin e kaluar. Në shtator 2023, udhëheqësi i Koresë së Veriut udhëtoi me trenin e tij të blinduar në rajonin e largët lindor të Rusisë, për një vizitë që përfshinte ndalesa në një fabrikë që prodhon avionë luftarakë dhe një fabrikë raketash.

(Vizita e Kim Jong Un me tren në Rusi)

Kim javën e kaluar përshëndeti të ardhmen e “lidhjeve kuptimplota dhe miqësisë së ngushtë” të Rusisë dhe Koresë së Veriut në një mesazh drejtuar Putinit duke përkujtuar ditën kombëtare të Rusisë më 12 qershor.

“Populli ynë i jep mbështetje dhe solidaritet të plotë punës së suksesshme të ushtrisë dhe popullit rus”, tha Kim, sipas gazetës zyrtare Rodong Sinmun.

Kremlini ka thënë se Rusia shpreson të ndërtojë një partneritet me Korenë e Veriut “në të gjitha fushat e mundshme”, sipas mediave shtetërore ruse.

Takimi vjen vetëm disa ditë pas një samiti të Grupit të Shtatë (G7) për ekonomitë e zhvilluara në Itali, ku mori pjesë presidenti ukrainas Volodymyr Zelensky, ku liderët perëndimorë përsëritën mbështetjen e tyre të qëndrueshme për Ukrainën dhe ranë dakord të përdorin asetet e ngrira ruse për të mbështetur një borxh 50 miliardë dollarësh për vendin e shkatërruar nga lufta.

Ky takim gjithashtu pason një samit ndërkombëtar të paqes të mbështetur nga Kievi gjatë fundjavës, ku morën pjesë më shumë se 100 vende dhe organizata, i cili kishte për qëllim të mbështeste vizionin e Zelenskit për paqen, i cili kërkon një tërheqje të plotë të trupave ruse nga territori ukrainas.

Lexo më tej: Samiti i paqes për Ukrainën jo plotësisht në unanimitet, DW: Paqja ende larg 

Putin i kundërshtoi këto përpjekje një ditë përpara mbledhjes duke ofruar kushtet e tij të paqes, duke përfshirë tërheqjen e trupave ukrainase nga katër rajone pjesërisht të pushtuara dhe që Kievi të tërhiqte ofertën e tij për t’u bashkuar me NATO-n, një propozim që shihet si i pamundur nga Ukraina dhe aleatët e saj.

Vizita e Putinit në Korenë e Veriut shihet gjerësisht si një mundësi që ai të kërkojë të forcojë mbështetjen e Kim për luftën e tij, një qëllim që mund të jetë gjithnjë e më urgjent pasi ndihma ushtarake amerikane e vonuar për Ukrainën po vjen.

Muajin e kaluar, Sekretari amerikan i Mbrojtjes, Lloyd Austin u tha ligjvënësve amerikanë se ofrimi i municioneve dhe raketave të Koresë së Veriut, si dhe dronëve iranianë, i kishin lejuar forcat ruse “të ngriheshin përsëri në këmbë”. 

Midis gushtit dhe shkurtit, Pheniani dërgoi rreth 6,700 kontejnerë në Rusi, të cilat mund të strehonin më shumë se 3 milionë predha artilerie ose më shumë se 500,000 raketa, tha në fillim të këtij viti ministria e mbrojtjes e Koresë së Jugut.

Si Moska ashtu edhe Pheniani kanë mohuar transferime të tilla armësh, me një zyrtar të lartë të Koresë së Veriut muajin e kaluar që i quajti akuza të tilla një “paradoks absurd”. 

Kur u pyet për shqetësimet se Rusia po shqyrton transferimin e teknologjive të ndjeshme në Phenian në këmbim të këtyre mallrave, një zëdhënës i Kremlinit javën e kaluar tha se “potenciali i vendeve për zhvillimin e marrëdhënieve dypalëshe” ishte “i thellë” dhe “nuk duhet të shkaktojë shqetësim për askënd dhe nuk duhet dhe nuk mund të sfidohet nga askush.” 

Putin në skenën botërore

Putini e vizitoi Korenë e Veriut për herë të fundit në vitin 2000, kur u takua me paraardhësin dhe babain e ndjerë të Kim, Kim Jong Il.

Udhëtimi i tij tani vjen pasi udhëheqësi rus duket i etur për të rivendosur veten në skenën globale, duke hequr imazhin e izolimit në vazhdën e pushtimit të tij të dënuar gjerësisht të Ukrainës duke tërhequr partnerë me të njëjtin mendim.

Muajin e kaluar Putin bëri një vizitë shtetërore në Pekin , ku ai dhe lideri kinez Xi Jinping bënë një pohim gjithëpërfshirës të kundërshtimit të tyre të përbashkët ndaj asaj që ata e shohin si një rend botëror të udhëhequr nga SHBA.

Moska javën e kaluar priti ministrat e jashtëm nga vende si Kina, Irani, Afrika e Jugut dhe Brazili për një takim të grupit BRICS.

Lexo më tej: Sfidat e BRICS-it/ Sa janë shanset që të thyhet dominimi global i SHBA-së 

Lëvizja e Putinit për të forcuar lidhjet me Korenë e Veriut ka qenë gjithashtu një ndihmë për Kim, i cili mbetet i papërkulur nga vitet e sanksioneve ndërkombëtare mbi programin e tij të paligjshëm të armëve bërthamore.

Kjo përkon me një periudhë të shqetësimit të shtuar ndërkombëtar në lidhje me synimet e liderit të Koresë së Veriut, teksa ai shtoi gjuhën luftarake dhe hoqi dorë nga një politikë e gjatë për të kërkuar ribashkim paqësor me Korenë e Jugut.

Vizita nga një udhëheqës i një vendi anëtar të përhershëm të Këshillit të Sigurimit të Kombeve të Bashkuara do të japë një sinjal për audiencën e brendshme të Kim për ndikimin e tij global, dhe një shans për të nxitur mbështetjen e nevojshme ekonomike dhe teknologjike nga Moska.

Rusia ka mbështetur më parë sanksionet ndërkombëtare dhe hetimet e mbështetura nga OKB-ja për programin e armëve të paligjshme të Koresë së Veriut, i cili përfshin teste të raketave balistike ndërkontinentale me rreze të gjatë veprimi që teorikisht mund të arrijnë në territorin e SHBA-së.

Por mbështetja e dukshme në rritje e Rusisë në Korenë e Veriut dhe fërkimet në rritje me Perëndimin duket se e kanë ndryshuar këtë dinamikë. Në mars, Moska vuri veton ndaj një rezolute të OKB-së për të rinovuar monitorimin e pavarur të shkeljeve të sanksioneve të Këshillit të Sigurimit nga Koreja e Veriut.

CNN, përshtati në shqip ©LAPSI.AL