Për kanabisin nuk po flitet shumë këtë vit. Policia pretendon se ka zhvilluar disa operacione të suksesshme, që të parandalojë kultivimin e drogës në zonat ku tradicionalisht është kultivuar hashash. Por pavarësisht kësaj, sasitë e drogës që sekuestrohen në anën tjetër të kufirit nuk janë të pakta. Sipas bilancit që ka kryer Guardia di Finanza, nga Shqipëria janë sekuestruar 6 ton e gjysëm kanabis vetëm në 4 muajt e parë të vitit 2018.
Të dhënat janë prezantuar në Romë në raportin e Guardia di Finanza nga fillimi i vitit 2017 e deri më sot. Sipas të dhënave zyrtare në një vit e gjysëm, italianët kanë sekuestruar gjithsej 100 ton drogë.
Por Ora News raporton se nga shifrat e Financas italiane rezulton se nga 1 nga janari i vitit 2018 e deri më 30 prill të 2018 janë kryer 11 operacione ajro-detare kundër trafikut të drogës mes Shqipërisë e Italisë.
Përgjatë këtyre operacioneve janë sekuestruar 6500 kg marijuanë e 1 kg hashash, si dhe janë arrestuar 18 skafistë, 10 prej tyre shqiptarë e 8 janë shtetas italianë. Gjithashtu janë sekuestruar dhe 7 mjete lundruese të përdorura për trafikun e drogës.
Kjo shifër e nxjerrë nga raporti i Guardia di Finanza tregon se trafiku i drogës drejt Italisë mban të njëjtat ritme, pavarësisht asaj që thuhet. Nëse trendi do të jetë i njëjtë edhe në 8 muajt e tjerë të vitit, atëherë shifrat do të jenë të krahasueshme me ato të viteve të shkuara, kur në krye të Ministrisë së Brendshme ishte Saimir Tahiri.