Edi Rama nxorri sot Fatmir Xhafajn për të sulmuar prokurorinë për shkak se ka kërkuar arrestimin e Saimir Tahirit.
Ministri i Brendshëm u prononcua gjatë e gjerë mbi çështjen, pak orë para se Këshilli i Mandateve të mblidhet për të vendosur fatin e Tahirit.
Ai tha se nuk ka prova që implikojnë Tahirin dhe se prokuroria u përdor politikisht.
Fatmir Xhafaj, 20 tetor 2017: “Për sa i përket për atë që më pyetët, nëse do më pyesni nga pikëpamja ligjore, nga pikëpamja legale, ajo çfarë është shkruar nga prokurorët e Krimeve të Rënda dhe për aq sa unë kam lexuar, nuk është një gjë që shpreh vullnetin e ligjit dhe besueshmërinë në prova. Që do të thotë sipas meje që jemi në rastin ku segmente apo individë të Prokurorisë, po vetë-përdoren politikisht në një çështje apo në një situatë të nxehtë politike”.
Por një ditë më parë Fatmir Xhafaj kishte tjetër qëndrim për çështjen. Duke shitur imazhin e një zyrtari të profilit të lartë, ai deklaroi se Ministri i Brendshëm nuk duhet të fliste kuf let drejtësia.
Fatmir Xhafaj: 19 tetor 2017: “Nuk besoj se bëj pjesë tek ata njerëzit që kam qejf të flasë pafund dhe për asgjë. Në këtë rast kur flet drejtësia këto janë çështje që i përkasin drejtësisë, nuk ka pse flet Ministria dhe ministri.
Po çfarë ka ndryshuar nga dje dhe sot në qëndrimet e Xhafajt? Burime konfidenciale i thanë lapsi.al se hetimet e prokurorisë së krimeve të rënda dhe antimafias italiane shkojnë shumë thellë. Po ashtu, besohet se Saimir Tahiri mund të ketë materiale kompromentuese për kupolën qeverisëse, çka ka shqetësuar Edi Ramën, i cili është detyruar ta marrë në mbrojtje, ish -ministrin, për të cilin deri dje kërkonte publikisht nëpër facebook që t’i vihej përpara drejtësisë, për të zbardhur të vërtetën. /Lapsi.al