Derbi i Romës ishte spektakolar si gjithnjë, por në fund triumfoi Roma, pikërisht në momentin më delikat për teknikun Di Francesco. Në katër ditë, verdhekuqtë morën dy fitore që e kanë qetësuar shumë ambjentin, por sidomos triumfi në derbi sinjalizon rikthimin e Romës.
Katër fitore radhazi nuk i mjaftuan Lazios “shqiptare” të dominojë qytetin, e ndër përgjegjësit e humbjes është edhe portieri Thomas Strakosha. Një dalje e pamenduar i dha mundësinë e shënimit të golit të parë Romës.
Nuk është se portieri ishte deciziv në humbje, sepse shumë më keq bëri Fazio, e megjithatë shtatlarti e korigjoi veten në fund, por jo më parë se të drithëronte teknikun në pankinë, kur pa katastrofën e lojtarit të tij.
Nuk mund të mungonte goli i ish-it në një derbi. Ndër tre golat e pësuar, ai i Kolarov ka dëshpëruar më shumë se të gjithë tifozët e Lazios. Strakosha ka mundur vetëm ta shohë trajektoren e serbit, ashtu si edhe golin e fundit të Fazios.
Roma fitoi derbin dhe shkon në 11 pikë, vetëm një pas bardhekaltërve. Ringjitja ka nisur dhe Di Francesco tani mund të punojë qetë.