Mërgim Mavraj është i njohur për batutat e tij të humorit, por edhe ironike. E këtë herë kapiteni i Kombëtares i ka bërë të dyja, sepse nuk ka ngurruar të shigjtojë edhe teknikun e përfaqësueses për etiketimin “skuadër e shurdhër”.
“Po fole, nuk garanton që nuk pëson gol. Janë shumë faktorë. Nuk garantohet asnjëherë që të mos pësojmë, nuk ta garanton fitoren – komentoi Mavraj -. Duhet të mbrojmë portën, por duhet edhe me shumë dëshirë të sulmojmë”.
Në ditën e parë të grumbullimit, tekniku i përfaqësueses, Christian Panucci, deklaroi se skuadra nuk flet në fushë, duke pësuar gola elementarë aq sa i dukej sikur drejtonte “një skuadër shurdhmemecësh”.
Përgjigjia për teknikun erdhi në mënyrë inteligjente, ashtu si qendërmbrojtësi i Aris Selanik, referuar pikërisht golit të parë të pësuar në Izrael, ku një top i gjatë i Harush, nga porta izraelite u shndërrua në asist për Hemed.
Pasi përdori ironinë, nuk mungoi edhe batuta e Mavraj, në vigjilje të përplasjes me Skocinë. “Duhet përqendrim, për të mbrojtur portën, pavarësisht se ke Mërgimin apo Ramosin në mbrojtje. 11 ushtarë, 11 kapitenë në fushë e bëjnë ekipin të mirë”.