Dukej një rast i arkivuar, përkundrazi deklaratat e Luciano Spalletti, pas ndeshjes Inter – Lacio, kanë rihapur rastin Icardi. Trajneri zikaltër ka qenë i qartë dhe i ashpër në përballjen me ish-kapitenin zikaltër: “Për mënyrën se si është sjellë, Icardi duhet të qëndronte jashtë. Është e drejtë që të luajnë të tjerët. Ndaj Lacios mund të luante edhe një pjesë, por ishte e drejtë të qëndronte jashtë. Duhet të kishte një ndërmjetësim për të bindur një lojtar të Interit për të veshur fanellën e skuadrës së tij, por kjo është poshtëruese për të gjithë tifozët zikaltër”. Fjalë që, sipas asaj që bën të ditur Corriere della Sera, nuk i kanë pëlqyer klubit. Janë të shumtë ata që i kanë dhënë të drejtë Spalletti në këtë pikë, mes të cilëve dhe ish-kapiteni zikaltër Beppe Bergomi, por jo drejtuesit e Inter. Pushteti i dhënë teknikut brenda dhomave të zhveshjes, nuk ka lidhje me daljen publike, për më tepër që puna e ndërmjetësimit ka qenë e gjatë dhe komplekse dhe jo vetëm Marotta, por dhe presidenti Steven Zhang dhe ish-presidenti Massimo Moratti janë konsumuar në tentativën për të shuar divergjencat.
Nëse është e vërtetë që Spaleti në këtë rast ka të drejtë, është e vërtetë që fjalët e tij janë përkthyer si një kritikë ndaj drejtuesve të klubit dhe, në mënyrë të veçantë, ndaj lojtarit. Marotta ishte përballur me Spalletti për mungesën e grumbullimit të argjentinasit, por nuk kishte menduar se do ti duhej të mendonte për deklaratat e papritura të teknikut. Në këtë mënyrë e ardhmja, si për sulmuesin, ashtu dhe për trajnerin, do të jetë larg Milanos. Në fund të qershorit palët do të largohen menjëherë dhe bashkë me ta edhe një pjesë e mirë e Interit aktual. Antonio Konte mbetet objektivi numër një, por nëse edhe Interi nuk do të arrijë ta bindë, do të synohet në një tjetër trajner, që do të ketë me vete një tjetër qendërsulmues. Edhe koha e Icardit në Milano ka mbaruar.