Debutimi në Superiore nuk është ai që do të dëshironte Partizani, ndërsa Kukësi jep sinjalin se për titull do të jetë deri në fund. Blutë e Shpëtim Duros imponohen me një 11 metërsh të Shkurtajt, por hakmarrja për humbjen e Superkupës dhe rikuperimi moral në një javë kohë janë ato që entuziazmojnë Kukësin, që i gëzohet tre pikëve të para.
Teknikët donin të tregonin se kishin përvetësuar gabimet e sfidës së Superkupës: Duro me Rrocën në pankinë e Lulajn në mbrojtje, ndërsa Lerda me heroin Broën në fushë krah Bardhit, me Malën në krah, për të mos rrezikuar nga daljet e shpenguara të Melos, që tani luante si qendër e djathtë. E megjithatë, krosimet dhe goditjet standarde ishin ato që sollën rreziqe për Avdylin e Hoxhën, një indikacion se skuadrat janë ende larg adaptimit të lojës së didktuar nga teknikët. Një episod vendosi ndeshjen dhe është ai i minutës së 38 kur Boldor nuk mundi ta fshehë me pozicionalitet ngadalësinë e tij dhe kapet në kohë vonesë në tentativë për të ndalur Ethemin. Penalltia e Jorgjit nuk i pëlqen rumunit që vazhdon proteston, por i pëlqen shumë Shkurtaj që nga pika e bardhë është i ftohtë sa duhet, për të mundur Hoxhën, një ekspert kur vjen puna tek penalltitë.
Lerda, ndryshe nga Superkupa, nuk hezitoi të forconte vijën e parë, tashmë me një treshe të frikshme Solomon-Cinari-Broën, me dy të parët që morën vendin e Bardhit e Melos. Por treshja nuk rezistoi shumë sepse në të 62 nigeriani u përfshi në një konflikt me Lulaj dhe Jorgji i tregoi daljen e shpejtë të dyve. Me 10 lojtarë Partizani funksionoi më mirë dhe fati mbajti në avantazh Kukësin: Mala, ndëshkuesi i Superkupës, këtë herë e përplasi topin në traversë, pa mundur ti bëjë keq Avdylit. Tentativat e fundit të Romeros, Telushit e Boldor nuk ndryshuan shifrat, por i treguan teknikut italian të Partizanit se me pak më tepër guxim Partizani është skuadër dominuese.
Start i keq i sezonit për të kuqtë, që përkeqësoi shifrat e Lerda: 6 ndeshje, dy barazime e një fitore, ndërsa Duro në anën tjetër dëshmoi edhe njëherë se është trajneri i emergjencave. Në pak javë në krye të Kukësit, arriti të konsolidojë një grup të ndryshuar në pjesën dërrmuese të saj e me blerjet e bëra së fundmi hedh zyrtarisht kandidaturën për titull…