Është imponuar 4-1 në ndeshjen kundër Luftëtarit, duke u rikthyer tek fitorja, por tek Kukësi ende nuk është vendosur harmonia. Goleada e fiksuar kundër bluezinjve nuk është tregues për perfomancën e Bluve, që presin më shumë nga Abazaj e Gavazaj, dy lojtarë që duhet të bënin diferencën, por që kanë rënë në hijen e Shkurtajt e Rrocës, që në këtë moment janë liderët e vërtetë të skuadrës së Shpëtim Duros: “E rëndësishme është fitorja. Vinim nga një moment jo i mirë psikologjik. Në një ndeshje të tillë është tensioni. Temperaturat e larta dhe fusha jo në nivelin e duhur ndikojnë. Ishim me fat që e zgjidhëm që në fillim ndeshjen dhe më pas e administruam. Ka probleme brenda skuadrës, e rëndësishme është që arritën të fitojmë”.
Tekniku kaloi nga me tre mbrojtës në katër, për ti dhënë më shumë forcë ofensivës dhe lojës në krahë të dyshes, por sinjalet i mori nga qendërsulmuesi: “Nuk është faji im që nuk shënon Abazaj dhe Gavazaj. Shkurtaj po bën paraqitje të mira – u justifikua tekniku -. Të tjerëve iu dhanë mundësitë. Do ishte shumë mirë po të kishin shënuar”.
Në avantazh që në minutën e 2 me golin e shpejtë të Ethemit, por Luftëtarin ndeshja u bë në ngjitje, ndërsa Kukësi mori kreditet pas dygolëshit të Shkurtajt, që në mes kishin rrjetën e tundur nga Rroca në minutën e 51 nga pika e bardhë e penalltisë. Për gjirokastritët Cela shënoi golin e ngushëllimit në minutën e 56.
14 pikë për Kukësin, që është tashmë në vendin e tretë , vetëm dy larg Bylis kryesues. Për bluezinjtë (6) situata nuk është premtuese, sepse me Lacin (10), që fitoi përballë Teutës, diferenca me zonën e shpëtimit është katër pikë.