Kompania Samsung, ka pranuar se me celularin e saj Galaxy S10 nuk jeni të sigurtë që nuk u a lexojnë mesazhet. Ky problem është zbuluar së pari nga një grua britanike, burri i së cilës mundi ta hapte telefonin me gjurmët e gishtit të madh, shkruan BBC.
Kur është lançuar S10-a, në muajin mars, Samsungu e ka përshkruar sistemin (skanerin) për leximin e gjurmëve të gishtave si një “revolucion”. Skaneri dërgon ultratingujt për të detektuar gjurmët 3D të gishtave në mënyrë që të identifikohen përdoruesit e smartfonëve. Samsungu ka thënë se ishte “i njohur me çështjen e identifikimit të gabuar të gjurmëve të gishtave te S10-a dhe se së shpejti do të prodhojë një softuer për zgjidhjen e kësaj çështjeje”.
Kompania jug-koreane KaKao Bank u ka thënë konsumatorëve që të çaktivizojnë skanerin për gjurmët e gishtave dhe të presin derisa ky problem të zgjidhet.
Çifti britanik i cili zbuloi këtë mangësi të sigurimit, ka thënë për revistën “The Sun” se ishte ky rast ishte një “shqetësim i vërtetë” për ta.
Pas blerjes së një xhami mbrojtës 2.70 funtesh (rreth 3 euro) në eBay, Lisa Neilson ka regjistruar në skaner gjurmët e gishtit të madh të djathtë dhe pastaj kuptoi që gishti i madh i majtë i saj, i cili nuk ishte i regjistruar, mund ta hapte po ashtu telefonin. Pastaj ajo i kërkoi burrit që ta provonte dhe të dy gishtat e tij të mëdhenj po ashtu e hapën telefonin.
Dhe kur xhamin mbrojtës e kanë vendosur në një tjetër S10, problemi është përsëritur.