Arbitri Mike Dean ka kërkuar që të mos aktivizohet në raundin tjetër të ndeshjeve pasi ka marrë kërcënime me vdekje në mediat sociale. Dean drejtoi Fulham-West Ham të shtunën e kaluar dhe vendimi që ndezi zemërimin në mediat sociale ishte kartoni i kuq i Soucek në kohën shtesë. Mesfushori i West Ham mori kartonin e kuq pas një bërryli në fytyrë ndaj Mitrovic, një episod i diskutueshëm sepse as Var nuk ishte në gjendje të deshifronte mirë nëse ishte një gjest i vullnetshëm apo i rastësishëm, duke i besuar Dean detyrën për të vendosur, duke u këshilluar me monitorin. Arbitri, pasi shqyrtoi disa herë imazhet buzë fushës, i tregoi Soucek kartonin e kuq. West Ham ka njoftuar se do të paraqesë një ankesë për të kërkuar anulimin e masës dhe për të shmangur skualifikimin për tre ndeshje, duke u përqëndruar në teorinë e pavullnetshmërisë.
Dean, 53 vjeç në 2 qershor, me origjinë nga Wirral, Anglia veri-perëndimore, ka qenë gjyqtar në Premier League që nga viti 2000. Karriera e tij është shënuar nga një seri episodesh. Më 5 prill 2009 ai u godit nga një monedhë gjatë derbit të Uellsit Cardiff-Swansea: autorit, 24 vjeç, iu ndalua hyrja në stadiume për tre sezone dhe vuajti një gjobë prej 200 £. Në shtator 2015, tifozët e Arsenalit nënshkruan një peticion duke kërkuar që ai të mos emërohej më në një ndeshje të Topçinjve pas një derbi me Chelsea. Më 2 prill ai i tregoi kartonin e kuq mbrojtësit aktual të Interit Ashley Young, në Wolverhampton-Manchester United: ishte i kuqi i 100-të i Dean në Premier, arbitri i parë në historinë e kampionatit anglez që arriti këtë shifër. Dean ka drejtuar në Angli – me përjashtim të ligave më të ulëta – dhe në fushën ndërkombëtare 681 ndeshje, 525 vetëm në Premier. Ai është një nga personazhet më të njohur në botën e arbitrave. Këtë herë, megjithatë, ai përfundoi në një histori të keqe. Mediat sociale e kanë masakruar atë në 48 orët e fundit dhe policia tani po heton kërcënimet me vdekje.