Presidentja e Kosovës, Vjosa Osmani, e shpalli të hënën ditë zie, ndërsa ndërpreu vizitën në Japoni për shkak të aksidentit ku 10 qytetarë me origjinë nga Kosova humbën jetën, dhe mbi 40 të tjerë u plagosën kur autobusi me të cilin udhëtonin, doli nga rruga në qytetin kroat, Sllavonski Brod. Sakaq, kryeministri Albin Kurti vizitoi mbrëmjen e së dielës, të plagosurit në qytetin kroat ku ndodhi tragjedia. Të gjithë të mbijetuarit e aksidentit ndodhen ende në Kroaci.
Mësohet se autoritetet e të dyja vendeve po punojnë për të mundësuar dërgimin në Kosovë, të qytetarëve në gjendje të mirë, dhe atyre me plagë të lehta. Shoferi i autobusit u arrestua të dielën, pasi u bë e ditur se e kishte zënë gjumi, ndërsa ishte në timon. Kryeministri i Kroacisë, Andrej Pllenkovic, u shpreh i hidhëruar nga ngjarja dhe i përcolli ngushëllimet familjarëve të viktimave. Dhjetëra qytetarë ndezën qirinj të dielën mbrëma para Teatrit Kombëtar në Prishtinë, në nderim të viktimave të aksidentit.