Një fabrikë është përfshirë nga zjarri në orët e para të mëngjesit të sotëm në Tiranë. Sipas të dhënave të para bëhet fjalë për linjën e prodhimit në fabrikën e Birra Tiranës në kryeqytet.
Policia bëri me dije se ngjarja ka ndodhur rreth orës 04:50, në rrugën “Konferenca e Pezës”. Si pasojë e flakëve ka vetëm dëme materiale. “Më datë 31.08.2021, rreth orës 04:50, në rrugën “Konferenca e Pezës”, ka rënë zjarr në ambientet e një fabrike, ku ka vetëm dëme materiale. Grupi hetimor vijon punën për përcaktimin e shkakut të rënies të zjarrit dhe sqarimin e rrethanave të ngjarjes,” thuhet në njoftimin e policisë, i cili, ndryshe nga herët e tjera nuk saktëson emrin e fabrikës ku ka ndodhur incidenti.