Milani bëri të tijin derbin e 230 në histori në fund të një ndeshjeje me dy fytyra: një pjesë e parë me ngjyra të forta zikaltër, që të besuarit e Inzaghit mund ta përfundonin lehtësisht me dy ose tre gola përpara; një pjesë e dytë dukshëm më e ekuilibruar, në të cilin ndryshimet e Piolit mundën t’i kthenin energjinë një ekipi që dukej paksa i dorëzuar. Ftohtësia dhe qartësia e kampionit bënë pastaj pjesën tjetër. Golat e gjashtë dhe të shtatë të Giroud në kampionat janë padyshim më të rëndësishmit e përvojës së tij italiane, që e projektojnë me të drejtë mes heronjve kuqezi duke ndezur ambiciet e të gjithë ekipit. Interi mbetet përpara (dhe ka gjithmonë një ndeshje më pak), por një mbrëmje si kjo është një nga ato që mund të japin shtytjen e duhur për të rifilluar me besim ndjekjen ndaj kampionëve në fuqi.
Një ndeshje në të cilën të gjithë donin të ishin protagonistë, edhe me një invazion të fushës, madje të dyfishtë, gjatë derbit mes Interit dhe Milanit në San Siro. Menjëherë pas golit të barazimit të kuqezinjve, një tifoz kapërceu barrierat duke shkuar për të brohoritur pranë pankinës së zikaltërve dhe u ndalua menjëherë. Pak minuta më vonë, edhe një tifoz i dytë arriti të hyjë në fushën e Meazzas, duke shmangur disa tentativa kapje nga stjuardët dhe duke u ndalur pasi praktikisht përfundoi një xhiro të tërë të fushës.
Situatë që natyrisht nuk e ka prishur fare shijen e fitores së Stefano Piolit, me përmbysje në derbi: “Vrapimi im në fund të ndeshjes? Kam qeshur duke e parë, nuk kam më moshë… – tha trajneri i Milanit për Dazn – Jam shumë i lumtur. Kam një skuadër që nuk heq dorë kurrë, djem që duan të kalojnë kufijtë e tyre, kjo është një fitore që duhet të na japë bindje, duke ditur në çdo rast që kemi të njëjtat pikë si sezonin e kaluar dhe për këtë arsye ka ende shumë për të bërë “.