Qeveria bullgare bie nën ndikimin rus/ Maqedonia e Veriut dhe Shqipëria bllokohen prapë në Bruksel

“Ishte nder për mua të drejtoja një qeveri që u rrëzua nga [oligarku dhe deputeti i Lëvizjes për të Drejta dhe Liri] Peevski, [“Ka një popull të tillë”] Trifonov, [ish-kryeministri Bojko] Borisov dhe [ambasadorja ruse në Sofie] Mitrofanova. Ky votim është vetëm një hap i vogël në rrugën e gjatë përpara. Ne do të vazhdojmë këtë betejë”. Me këto fjalë Kiril Petkov la detyrën e kryeministrit në Bullgari. Po sot ai kishte premtuar të hiqte veton për çeljen e negociatave të Maqedonisë së Veriut dhe të Shqipërisë.

Por Petkov humbi një mocion mosbesimi të ngritur nga opozita të mërkurën.

Nga 240 deputetë në dhomë, 123 votuan për ta rrëzuar përmes një bashkimi votash, për të cilin ai akuzoi edhe ambasadoren ruse në Sofie.

Pak më parë, votat për Maqedoninë e Veriut dhe të Shqipërisë ishin gati.

Opozitari Boiko Borisov kishte premtuar 59 vota, përmes një qëndrimi surprizë që ringjalli shpresat e integrimit.

“Ne nuk do të jemi në anën e errët të Euroazisë, nuk do të bëhemi të Putinizuar”, tha Borisov për mediat të mërkurën, pavarësisht se qeveria e tij, e cila ra në fillim të 2021, u kritikua për vendosjen e bllokadës ndaj ofertës së Shkupit për në BE dhe mbajtjen e Bullgarisë, në një gjendje të varësisë së gazit nga Rusia.

Qëndrimi i Borisov riktheu shpresat në Tiranë dhe në Shkup për një vendim pozitiv nga Bashkimi Europian për çeljen e negociatave.

Kryeministri Rama tha se ishte “shumë herët për të qenë optimist” duke i mbetur asaj pjese të fjalimit ku e konsideron Bullgarinë “një vend që ka marrë peng dy vende, kur ka një luftë në prag të Europës”.

Ndërkohë në Bullgari, forcat proruse janë në revansh.

Më 8 qershor, lideri i “Ka një popull të tillë” Slavi Trifonov njoftoi largimin e papritur të partisë së tij nga koalicioni, duke përmendur mosbesimin ndaj kryeministrit Petkov për një sërë çështjesh.
Ato përfshinin planet e tij të supozuara për të hequr bllokadën e Bullgarisë në fillimin e bisedimeve të anëtarësimit të Maqedonisë së Veriut në BE, pavarësisht mosmarrëveshjeve të pazgjidhura historike dhe pa u konsultuar me partnerët e tij të koalicionit.

Të martën, kundërprotesta u organizuan nga Revival, një parti nacionaliste pro-Kremlinit dhe një prani e fundit në parlament.

Këto demonstrata ishin në mbështetje të opozitës – edhe pse partia ishte deri vonë një kundërshtare e GERB-it – me liderin Kostadin Kostadinov që pretendonte se rënia e qeverisë mund ta çlironte Bullgarinë nga BE-ja, e parë prej tyre si nën hijen e interesave dhe identitetit të vërtetë bullgar.

Më 19 qershor u krijua zyrtarisht një parti tjetër miqësore me Kremlinin, Ngritja Bullgare, e kryesuar nga Stefan Yanev, një ish-kryeministër i përkohshëm dhe këshilltar i Presidentit Rumen Radev.

Të mërkurën, oligarku dhe deputeti Delyan Peevski, i sanksionuar sipas Aktit Magnitsky dhe i përmendur në Pandora Papers për pasuritë e tij në zonat ofgshore, mori pjesë në një protestë antiqeveritare.

Kryeministri Kiril Petkov, një biznesmen i shkolluar në Harvard, formoi një koalicion qeveritar me katër parti në dhjetor, pasi vendi kishte zhvilluar tre procese zgjedhore njëri pas tjetrit. Ai ka kërkuar një zgjidhje për një mosmarrëveshjen etno-kulturore që ka bllokuar përpjekjet e Maqedonisë së Veriut dhe Shqipërisë për t’u bashkuar me BE.

Bullgaria është anëtare e BE-së dhe NATO-s.

Pushtimi rus i Ukrainës më 24 shkurt e ka shtyrë BE-në të shqyrtojë përshpejtimin e përpjekjeve të anëtarësimit në Ballkanin Perëndimor për të parandaluar Moskën të zgjerojë ndikimin e saj në rajon./Lapsi.al