Endrit Dokle, Fatjon Murataj dhe Gentian Reçi janë shoqëruar ditën e djeshme në polici. Dokle dhe Reçi janë lënë të lirë. Ndërsa Murataj është ndaluar për shkak se ishte shpallur në kërkim për armëmbajtje pa leje.
Gentian Reçi është nip i Xhelal Reçit, ish-policit të ekzekutuar një vit më parë në Laç. Ai ka lidhje krushqie me Doklen. Murataj është shpallur në kërkim pas zbulimit të 2 bazave armatimi në korrik të këtij viti në Tiranë.
Të tre këta persona udhëtonin me një makinë të blinduar. Ata janë ndaluar nga forcat “Shqiponja” të Tiranës. Më pas janë shoqëruar në Drejtorinë e Policisë.
Emrat e tyre u përmendën edhe pak kohë më parë për masakrën e Fushë Krujës ku u vranë Brilant Martinaj, Diklen Vata dhe Besmir Hoxha. Ishte një dëshmi e të penduarit Nuredin Dumani që lidhte hasmëritë mes grupit të Ervis Martinajt dhe Endrit Dokles.
Dumani tha se Martinaj i kishte ofruar 500 mijë euro për eliminimin e Dokles. Hetuesit e morën në pyetje Doklen. Në polici ai mohoi përfshirjen në masakrën e Fushë Krujës duke ofruar dhe një alibi.
Ai tha se mund të vinte në dispozicion dhe kamerat e vendit ku kishte qenë në kohën kur ndodhi vrasja e trefishtë në Fushë-Krujë.
“S’kam lidhje me ngjarjen. Nuk kam asnjë konflikt me ta. Jam ndodhur në një ambient me kamera sigurie kur ka ndodhur ngjarja dhe mund tua vë në dispozicion”, mësohet të ketë thënë Dokle.
Edhe emri i Fatjon Muratit që mbrëmjen e së shtunës gjendej në një makinë me Doklen u lakua pas vrasjes së 17 korrikut. Endrit Dokle rifitoi lirinë me kusht nga gjykata e Krujës afro 2 vite me parë, ndonëse ishte dënuar më burg përjetë. ©LAPSI.al