Një gjykatë në Budapest të Hungarisë lëshoi të hënën një urdhër ekstradimi të përkohshëm për një serb. Ky person është dyshuar për krime lufte ndaj popullatës civile në Kosovë.
Ai akuzohet për vrasjen e 33 shqiptarëve të 23 vite më parë në lagjen “Kristal” në Pejë.
Përveç tij, edhe dy serbë të tjerë dyshohet se janë të përfshirë në këtë rast. Prokuroria e Përgjithshme e Budapestit njofton se i akuzuari është arrestuar mbi urdhër-arrestin ndërkombëtar të lëshuar nga Përfaqësuesi Special i Sekretarit të Përgjithshëm të Kombeve të Bashkuara në Kosovë.
“Urdhër-arresti është lëshuar shtatorin e kaluar për shkak të krimeve të luftës të kryera kundër popullatës civile”. Kështu thuhet në deklaratë.
Tutje theksohet se gjykata hungareze, do të shqyrtojë procesin e ekstradimit të të dyshuarit. Dhe, se Prokuroria nëpërmjet Ministrisë hungareze të Drejtësisë do të kalojë në kontakt me autoritetet gjyqësore të Kosovës.
Në shkurt të 2021, Gjykata Themelore në Prishtinë e kishte shpallur fajtor të akuzuarin për krime lufte në lagjen “Kristal” të Pejës, Zoran Gjokiç.
Ai u dënua me 12 vite burgim, ku do t’i llogaritet edhe koha e kaluar në paraburgim.
Lexo më tej: Videoja virale/ Pse Edi arrin ta skuqë gjithmonë Albinin
Lexo më tej: Albin Kurti: Nuk e kam dëgjuar fjalimin e Edi Ramës në Këshillin e Europës