Momenti i mirë i Manchester United, përfundoi pak minuta nga fundi i ndeshjes kundër Arsenal. Kryesuesit mbizotëruan 3-2 dhe vazhduan të imponojnë ritmin e tyre të furishëm në Premier League. Djajtë e Kuq, ndërkohë, u detyruan të dorëzoheshin kur shpresonin të merrnin një pikë në Emirates. E siç ndodh shpesh, kur United nuk fiton, vijnë kritikat. Sidomos nga ata që e kanë veshur atë fanellë dhe e dinë se sa pritshmëri ka mbi lojtarët e klubit. Prandaj, goditjet pas humbjes ndaj Arsenal vijnë nga dy protagonistë të mëdhenj të ciklit të Sir Alex Ferguson: Rio Ferdinand dhe Roy Keane.
FERDINAND ‘MASAKRON’ ANTONY
Ish-mbrojtësi e ka veçanërisht me një nga blerjet e mëdha të verës, brazilianin Antony. Anësori ka mbërritur nga Ajax për gati 100 milionë euro. Por edhe pse klasi dhe shifrat nuk janë në diskutim, kontributi i tij te Manchester United nuk e bind plotësisht Ferdinand. Ish-mbrojtësi nuk kurseu kritikat ndaj futbollistit. “Ai nuk kalon askënd në një kundër një dhe unë pyes veten ‘a ka qenë gjithmonë kështu?’ Kam parë video kur ishte te Ajax dhe ishte një lojtar që i fitonte duelet individuale. Por sot pashë Thomas Partey, që nuk do ta fusja në kategorinë e sprinterëve, duke i kaluar si shigjetë dhe mendova se ndoshta Antoni nuk e kishte gjithë këtë forcë në këmbë”. Është në rregull të jesh një anësor që bën numra, por gjithsesi duhet të kapërcesh mbrojtësin!”
KEANE BËN FINANCIERIN
Keane në vend të kësaj fokusohet në të kaluarën. Duke folur për Sky Sports, irlandezi vuri në pah praninë në fushë të katër lojtarëve që sipas tij simbolizojnë vazhdimësinë me periudhat katastrofike të mëparshme. “United ka bërë progres, por në fund të lojës unë ende shoh Luke Shaw në fushë Aaron Wan-Bissaka, Fred, Scott McTominay. Është sikur Manchester United ende nuk i ka kapërcyer problemet e së kaluarës. Nuk dua t’i fajësoj ata, ishte një ndeshje e vështirë. Por unë mendoj se United ka ende një skuadër të shkurtër. Lojtarët e rëndësishëm mungonin sot, por një skuadër si United duhet të jetë në gjendje të përballojë një situatë të ngjashme”.
“Por pastaj sheh pankinën dhe nuk ishte fare e mirë. Për gjithë paratë që ka shpenzuar, United ka një skuadër të shkurtër. Unë mendoj se ata do të përfundojnë në katërshe, ndoshta edhe duke fituar një kupë. Por nëse flasim për konkurrencën në Premier League, nuk jemi kërrkund”.