Prej muajsh dihet se cili do të jetë kodi i veshjes për mbrëmjen e MET Gala 2023. Evenimenti më i shumëpritur dhe ekskluziv i modës, do të mbahet gjatë natës mes 1 dhe 2 majit.
Kodi do të jetë: Karl Lagerfeld: Një linjë e bukurisë”. Muzeu Metropolitan i Artit në Nju Jork do të presë krijimet më emblematike të trashëgimisë së stilistit të ndjerë, i cili gjatë karrierës së tij të gjatë, drejtoi shtëpi luksoze si Chanel, Fendi dhe Chloé.
Pas thashethemeve për çmimet e tepruara të mbrëmjes, të cilat bënë që shumë të famshëm të refuzojnë ftesën, një artikull në Financial Times zbulon nxitimin e çmendur të stilistëve drejt sendeve arkivore që i përkasin Karl Lagerfeld, të mbajtura si kujtime brenda butikëve të të gjithë botës.
Sidomos në Los Angeles, situata duket se po del jashtë kontrollit. Në një intervistë me Cameron Silver, themeluesin e butikut “Decades”, dalin në pah disa nga kërkesat absurde të klientëve dhe mbi të gjitha të stilistëve të famshëm.
Vintage
Sigurisht, interesi për arkivat e Lagerfeld ka qenë gjithmonë shumë i lartë, por asnjëherë si kohët e fundit. Nga ajo që del nga intervista, disa stilistë do të përpiqeshin dëshpërimisht të rikuperonin disa pjesë arkivore të Chanel (nga Karl Lagerfeld) që nuk janë të zeza. Pse? Anna Wintour në përgjithësi nuk e adhuron këtë ngjyrë dhe ekziston një frikë absolute se mos e zhgënjejnë presidenten e MET Gala.
Mjaft ironike, duke pasur parasysh se maison është shpikësi i “Fustanit të Zi të Vogël”, dhe se e zeza ishte ngjyra kryesore e krijimeve të Lagerfeld. Të tjerë, megjithatë, sipas Alex Novak (i cili menaxhon butikun Tab Vintage) madje po kërkojnë pjesë nga vitet 1950, kur stilisti, pasi la atelienë e Pierre Balmain, filloi të punonte për Jean Patou.
Pronari i butikut Pechuga Vintage, Johnny Valencia, aktualisht po punon me stilistë të famshëm si Anitta, Emily Ratajkowski dhe Paloma Elsesser. Por ndër kërkesat e ardhura ditët e fundit, del ajo e një klienti të panjohur, i cili do të donte me çdo kusht një fustan të zbukuruar me bizhuteritë ari të veshur nga Linda Evangelista në vitin 1995, në një editorial për Harper’s Bazaar.
Në atë që po kthehet në një garë të vërtetë për të marrë fustanin më të mirë, një gjë është e qartë: MET Gala e këtij viti do të jetë totalisht e fokusuar tek moda arkivore, një kategori mode që së fundmi po ngjall gjithnjë e më shumë interes.